သူ၏ နိုင်ငံရေး သက်တမ်း တလျောက်လုံးလည်း အနီ များကို ရဲရဲတောက် ဆန့်ကျင်ခဲ့သူ ဖြစ်သည်။ အစိမ်းလည်း ဖြစ်ကောင်း ဖြစ်နိုင်သည်၊ ဒုက္ခသည်များကို လက်ကမ်း၍ ကြိုဆိုခဲ့သည့် အနည်းငယ်မျှသာ ရှိသော ကယ်လီဖိုးနီယား တောင်ပိုင်း နိုင်ငံရေး သမား များ တွင် တဦး အပါအဝင် ဖြစ် နေသော ကြောင့်ပင်၊ အမေရိကန် အများစု ကတော့ ကျွန်တော်တို့ကို လုံးဝ မနှစ်မြို့ သည့် သဘောမျိုး မရှိသော်လည်း ၎င်းတို့၏ သဘောထား ကအမျိုးမျိုး ကွဲပြားနေသည်။

ကျွန်တော် တို့ကို မြင်နေရပါက ၎င်းတို့ အကြီးအကျယ် အရေးနိမ့်သွားခဲ့သည်ကို လက်တို့ သတိပေးနေသလို ဖြစ်လာရသည်။ အခြားသော အရောင်ရှိသူများကို နေရာ မပေးလိုတော့၊ အထူးသဖြင့် အမေရိကန် တို့၏ ပိုက်ဆံအိတ်များထဲ မှ နှိုက်ယူနေကြသော ကျွန်တော်တို့လို မွဲပြာကျနေသည့် အသားဝါများ အတွက် နေရာမရှိ၊ လက်ရှိ အဖြူ နှင့် အမည်းများ အကြား Ying နှင့် Yang လို ဆန့်ကျင်ဘက် ဖြစ်နေမှု များအကြား ဟန်ချက်ညီ အောင် ထိန်းသိမ်းနေရမှု ကို ခြိမ်းခြောက်လာနေသည်ဟု ယူဆကြသည်။

ကျွန်တော်တို့သည် သူတို့ အတွက် ထူးဆန်းသော ဂြိုလ်သားများ အလား ဖြစ်နေပြန်သည်။ အဘယ်ကြောင့်ဆိုသော် ဖိုင်ဒို အမေရိကားနပ်စ် (Fido Americanus) ခေါ် အိမ်မွေးခွေးများကို အလွန်နှစ်သက်သည်ဟု ကောလဟာလသတင်းများ ထွက်ခဲ့သောကြောင့်ဖြစ်သည်။ ထိုခွေး တကောင်ချင်းစီ အတွက် ငတ်မွတ်နေသည့် ဘင်္ဂလားဒေ့ရှ် မိသားစုတစ်စု၏ နှစ်စဉ် ဝင်ငွေထက် မက သုံးစွဲပစ်ခဲ့ကြသည်ဟု ‌ဆိုသည်။

ထိုသို့ ကြောက်မက်ဖွယ် ကောင်းလှသည့် ကောလဟသ ထွက်လာခဲ့မှု တွင် ကျွန်တော်တို့ အနေအထားသည် သာမန် အမေရိကန် တဦး၏ နားလည် နိုင်စွမ်းထက် ကျော်လွန်နေသည်။ ကျွန်‌ တော်တို့ထဲမှ အချို့သည် Rin Tin Tin နှင့် Lassie တို့၏ မျိုးနွယ်ဝင် ခွေးသား ကို စားသုံးခဲ့သည်မှာ မှန်သော်လည်း၊ ၎င်းတို့ ထင်ထားသလို တုတ်နှင့် ကင်ခြင်း၊ ဆားအနည်းငယ်ဖြင့် Neanderthal လူရိုင်းဆန်သော ပုံစံဖြင့် စားသုံးခြင်း မဟုတ်။ သို့သော် ဟင်းချက်ပညာရှင်တစ်ဦး၏ ကျွမ်းကျင်မှု၊ တီထွင်ဖန်တီးနိုင်စွမ်းနှင့် နက်နဲသော ဉာဏ်ပညာဖြင့် ချက်ပြုတ် စားသုံးခြင်း ဖြစ်သည်။ ကျွန်ုပ်တို့၏ စားဖိုမှူးများသည် ခွေးသားကို အားတိုးစေသော နည်းလမ်း ခုနစ်မျိုး ဖြင့် ချက်ပြုတ်နိုင်စွမ်း ရှိသူ များ ဖြစ်သည်—ရိုးတွင်းခြင်ဆီ ထုတ်ယူခြင်းမှသည် ကင်ခြင်း၊ ပြုတ်ခြင်း၊ ဝက်အူချောင်းလုပ်ခြင်း၊ အိုးကပ်ချက်ခြင်း၊ ကြော်ခြင်းနှင့် ပေါင်းခြင်း အမျိုးမျိုးတို့ဖြင့် အရသာရှိရှိ စားသုံးနိုင်သည်။ သို့သော်လည်း ယခု ကွန်ဂရက်အမတ်ကမူ သတင်းစာ တွင် ကျွန်‌ တော် တို့အား ကာကွယ်သည့် အယ်ဒီတာအာဘော်များ ရေးသား‌ ပေးခဲ့ပြီး ရွှေ့ပြောင်းအခြေချသူများအား သူ၏ အော်ရိမ်း စီရင်စု မဲဆန္ဒနယ်မြေသို့ ကြိုဆိုခဲ့သည်။

ကလပ် ဂေဘဲလ် နှင့် တူသော လူကို ဘေးတွင် ထားပြီး မိုက်ကရိုဖုန်းကို ကိုင်ကာ "အိုး..ဘုရားရေ၊ ကြည့်ကြစမ်းပါဦး" ဟု ဆိုကာ စကားစလိုက်သည်၊ သူတို့ နှစ်ယောက်ကို အမျိုးသမီး နှစ်ဦး က ဝိုင်းရံထားသည်။ သူသည် အသက်အားဖြင့် လေးဆယ်ကျော်ခန့်သာ ရှိဦးမည် ဖြစ်ပြီး ရှေ့နေ မှ နိုင်ငံရေးသမား အဖြစ် ကူးပြောင်းလာခြင်း ဖြစ်သည်။ ထို့အတွက်လည်း ရှေ့နေတဦး၏ စိတ်မာ ခက်ထန်မှု နှင့် နိုင်ငံရေး သမားတဦး၏ ပြေပြစ် ချောမွေ့စွာ ပြောဆိုတတ်မှု တို့ကို သူ၏ ဦးခေါင်းက သရုပ်ပြပေးနေသလို ဖြစ်နေသည်။ ထို ဦးခေါင်းသည် ဖောင်တိန်ထိပ်ဖျားကဲ့သို့ ပြောင်လက်၊ တောက်ပြောင်ပြီး ချွန်မြနေကာ၊ စကားလုံးများသည် အကောင်းဆုံး အိန္ဒိယ မှင်ရည်များကဲ့သို့ပင် လွယ်ကူစွာ စီးထွက်ကျလာခဲ့သည်။

သူသည် ကလပ် ဂေဘယ် ထက် ခေါင်းတလုံးစာ ပိုမြင့်သည်။ ခန္ဓာကိုယ် အရွယ်အစားက အလွန်ကြီးမားလွန်းသဖြင့် ပုံမှန်အရပ်အမောင်းနှင့် ကိုယ်လုံးကိုယ်ထည်ရှိသော ဗီယက်နမ်အမျိုးသားနှစ်ဦးပင်လျှင် သူ့ခန္ဓာကိုယ်၏ ထဲသို့ ညှစ်ပြီး ဝင်ဆံ့နိုင် လောက်သည်။

ကြွရောက်လာတဲ့ အမျိုးသား၊ အမျိုးသမီးများ ခင်ဗျာ၊ ကိုယ့်ကိုကိုယ် ပြန်ကြည့် ကြည့် ကြစမ်းပါ၊ ကျွန်တော်တို့ အမေရိကန် တွေဟာ ခင်ဗျားတို့ကို ဘယ်လို မြင်စေချင်လဲဆိုရင်၊ 'အမေရိကန် သား ချင်းများ' အဖြစ် မြင်စေချင် နေကြ တာပါ။

ဒီလို ညမျိုး မှာ ရောက်လာပြီး အတူတူ ပျော်ရွှင်နိုင်ခွင့် ရတဲ့ အတွက် အလွန် ကျေးဇူး တင်မိပါတယ်။ ခရစ်ယာန် စကြာဝဠာ ကြီး အတွင်းရှိ အမေရိကန် လရောင်အောက်က ကယ်လီဖိုးနီယား မြေပေါ်မှာ အင်မတန် ချစ်စရာ ကောင်းတဲ့ ဗီယက်နမ် မောင်နှံ တရုတ် ပျော်ပွဲစားရုံ ထဲမှာ ထိမ်းမြား မင်္ဂလာဆောင်တဲ့ အခမ်းအနား ပြုလုပ်နေတဲ့ အချိန်၊ ခင်ဗျားတို့ကို တစ်ခုခု ပြောပါရစေ။ ကျွန်တော် ခင်ဗျားတို့ရဲ့ တောင်ပေါ်ဒေသ က လူတွေကြားမှာ နှစ်နှစ်ကြာ နေထိုင်ခဲ့ပြီး ခင်ဗျားတို့ရဲ့ စစ်သားတွေနဲ့အတူ တိုက်ပွဲဝင်ခဲ့သလို၊ ခင်ဗျားတို့ရဲ့ ကြောက်ရွံ့မှုတွေကို မျှဝေခံစားခဲ့ရပြီး ရန်သူကို ရင်ဆိုင်ခဲ့ပါတယ်။ အဲဒီအချိန်ကရော အခုပါ ကျွန်တော် ဘယ်လိုတွေးမိလဲဆိုတော့၊ ပိုမိုကောင်းမွန်တဲ့ ဘဝတစ်ခုအတွက် ခင်ဗျားတို့ရဲ့ မျှော်လင့်ချက်တွေ၊ အိပ်မက်တွေနဲ့ ရည်မှန်းချက်တွေအတွက် ကျွန်တော့်ရဲ့ ဘဝကို စတေးခြင်းထက် ပိုမိုကောင်းမွန်တဲ့ လုပ်ရပ်မျိုး မရှိနိုင်ဘူးလို့ပါပဲ။"

အဲဒီမျှော်လင့်ချက်တွေ၊ အိပ်မက်တွေနဲ့ ရည်မှန်းချက်တွေဟာ ခင်ဗျားတို့ရဲ့ မိခင်မြေမှာ ပြည့်ဝလာမယ်လို့ ကျွန်တော်ဟာ ခင်ဗျားတို့လိုပဲ အမှန်တကယ် ယုံကြည်ခဲ့ပေမဲ့၊ သမိုင်းကြောင်းနဲ့ ဘုရားသခင်ရဲ့ ပဟေဠိ ဆန်ပြီး မေးခွန်းထုတ်စရာမလိုတဲ့ ကျေးဇူးတော်ကြောင့် ကျွန်တော်တို့ဟာ နောက်ထပ် ကံကြမ္မာတစ်ခုနဲ့ ရင်ဆိုင်ခဲ့ရပါတယ်။ ခင်ဗျားတို့ကို ကျွန်တော် ပြောမယ်။ ဒါဟာ ခဏတာ ကံမကောင်းခြင်း တစ်ခုပါပဲ။ ဘာလို့လဲဆိုတော့ ခင်ဗျားတို့ရဲ့ စစ်သားတွေဟာ ကောင်းကောင်းမွန်မွန်နဲ့ ရဲရဲရင့်ရင့် တိုက်ခိုက်ခဲ့ကြ ပေမယ့်၊ သမ္မတ ကတိပေးခဲ့သလိုမျိုး ကွန်ဂရက်ကသာ ခင်ဗျားတို့ကို မဆုပ်မနစ် ထောက်ခံခဲ့မယ်ဆိုရင် အောင်ပွဲခံခဲ့ပြီးသား ဖြစ်မှာပါ။ သမ္မတ ကတိကို အမေရိကန် အတော်များများက သဘောတူကြပါတယ်၊ အားလုံးတော့ မဟုတ်ဘူး ပေါ့ဗျာ၊ ဒီမိုကရက်တွေ၊ မီဒီယာတွေ၊ စစ်ဆန့်ကျင်ရေး အဖွဲ့တွေ၊ ကောလိပ်ကျောင်းသားတွေ၊ ဟစ်ပီတွေ ရှိနေကြတယ်၊ အမေရိကား ဟာ အထဲက အကွဲအပြဲတွေကြောင့် အားပျော့လာရတယ်၊ ဒီအထဲမှာ အရှူံးပေးသမားတွေ၊ ကွန်မြူနစ်တွေ၊ တက္ကသိုလ် တွေထဲ၊ သတင်းဌာနတွေထဲ၊ ကွန်ဂရက်ထဲတွေမှာ လူးလာခတ်နေတဲ့ သစ္စာဖောက်တွေ ပါတယ်။ သူတို့အားလုံးက ခင်ဗျား တို့ကို မြင်နေရရင် သူတို့တွေရဲ့ သူရဲဘောကြောင်ခဲ့တာ တွေ၊ သစ္စာဖေါက်ခဲ့တာတွေ ပြန် သတိပေး ခံရသလို ဖြစ်လာကြလို့ပဲ၊ ကျွန်တော် ဒီကို အရောက်လာပြီး ပြောချင်တာက ခင်ဗျား တို့က အမေရိကန် တွေ ပေးခဲ့တဲ့ မဟာ ကတိတွေ ဘာလဲဆိုတာ ကျွန်တော်ကို သတိပေးနေတယ်။ 

ရွှေ့ပြောင်းအခြေချ လာသူ တွေအတွက် ကတိကဝတ်၊ အမေရိကန်အိပ်မက် ရဲ့ ကတိကဝတ်၊ အမေရိကန် နိုင်ငံသား တွေ ယခင်က တန်ဖိုးထားခဲ့ကြပြီး မကြာမီ တစ်နေ့တွင် ပြန်လည်တန်ဖိုးထား မြတ်နိုးလာကြမည့် ကတိကဝတ်...အဲ့ဒီ ကတိကဝတ် တွေ ကတော့ - အမေရိကန်ပြည်ထောင်စုသည် လွတ်လပ်မှုနှင့် ကိုယ်ပိုင်ပြဋ္ဌာန်းခွင့်ရှိသော နယ်မြေ၊ ကမ္ဘာ့မည်သည့်အရပ်၌မဆို ရှိနေသည့် အားနည်းသူများဘက်မှ အစဉ်အမြဲ မားမားမတ်မတ် ရပ်တည်ပေးခဲ့သော မျိုးချစ်တို့၏ နယ်မြေ၊ မိတ်ဆွေစစ်ကို ကူညီရန်နှင့် ရန်သူတို့ကို ချေမှုန်းသုတ်သင်ရန် ဘယ်တော့မှ တွန့်ဆုတ်သွားမည်မဟုတ်သော သူရဲကောင်းတို့၏ နယ်မြေ၊ ဒီမိုကရေစီနှင့် လွတ်လပ်ခွင့်ဟူသော ကျွန်ုပ်တို့၏ ဘုံရည်မှန်းချက်အတွက် များစွာ ပေးဆပ်စွန့်လွှတ်ခဲ့သည့် ခင်ဗျား တို့လို လူတွေကို ကြိုဆိုနေတဲ့ နယ်မြေဖြစ်တယ်။

"မိတ်ဆွေတို့... တစ်နေ့နေ့မှာတော့ အမေရိကန်ပြည်ထောင်စုဟာ ပြန်လည်ပြီး ထည်ဝါခန့်ညားလာပါလိမ့်မယ်။ ခင်ဗျား တို့ ကြောင့်ပဲ အဲဒီလိုဖြစ်လာမှာပါ။ ဒါ့အပြင် မိတ်ဆွေတို့... ခင်ဗျား တို့လက်လွတ်ဆုံးရှုံးခဲ့ရတဲ့ မွေးရပ်မြေဟာလည်း တစ်နေ့ ခင်ဗျားတို့လက်ထဲ ပြန်ရောက်လာပါလိမ့်မယ်။ ဘာဖြစ်လို့ ဒီလို ပြောနိုင်လဲ ဆိုတော့ လွတ်လပ်ခွင့်ဆီသို့ ဦးတည်နေတဲ့ လှုပ်ရှား ရုန်းကန် မှု နဲ့ ပြည်သူ တွေရဲ့ ဆန္ဒသဘောထားကို ဘယ်အရာကမျှ တားဆီးပိတ်ပင်ထားနိုင်လို့ မရတဲ့ အတွက် ကြောင့်ပဲ ဖြစ်တယ်။

ကဲ... အခုချိန်မှာတော့ ကျွန်‌ တော် တို့အားလုံး ယုံကြည်သက်ဝင်ထားတဲ့အရာကို ခင်ဗျား တို့ရဲ့ လှပတဲ့ ဘာသာစကားနဲ့ ကျွန်ုပ်နှင့်အတူ သံပြိုင်ကြွေးကြော် အတည်ပြုလိုက်ကြပါစို့..."

နားထောင်နေသည့် ပရိသတ် ကြီး က သဘောအကျကြီး ကျကာ လက်ခုပ်တဖျောင်း ဖျောင်း နှင့် အတောမသတ် အောင် အားပေးနေကြသည်။ ယခုလို အချိန်တွင်သာ ကွန်မြူနစ်တဦး ကို လှောင်အိမ်ထဲ ထည့် ယူလာပြီး တံခါး ဖွင့် လွှတ်ပေးလိုက်မည် ဆိုက ၎င်းအား သူ၏ ကြီးမား သော လက်ကြီးများ ဖြင့် အရှင်လတ်လတ် ကလီစာတွေ ဆွဲထုတ်ပစ်ဟု ပရိသတ်က အော်ဟစ် တောင်းဆိုကြမည်သာ ဖြစ်သည်။

ပရိသတ်ကို ဒီထက်ပိုပြီး စိတ်ဓာတ်တက်ကြွအောင် လှုံ့ဆော်ပေးဖို့ဆိုတာ ဘယ်လိုမှ မဖြစ်နိုင်တော့ဘူးလို့ ထင်ရပေမဲ့ သူကတော့ လုပ်ပြသွားခဲ့သည်။ သူသည် လက်နှစ်ဖက်ကိုမြှောက်ကာ 'V' ပုံသဏ္ဌာန် လုပ်ပြလိုက်သည်။ ထို 'V' သည် အောင်ပွဲ (Victory) ကို ဆိုလိုသလား၊ ဗီယက်နမ် (Vietnam) ကို ဆိုလိုသလား၊ သူ့ကို မဲပေးပါ (Vote for me) ဟု ဆိုလိုသလား၊ သို့တည်းမဟုတ် ထိုထက်ပို၍ စိတ်ကို လှုံ့ဆော်ပေးနိုင်သော အရာတစ်ခုခုကို ရည်ညွှန်းသလား မကွဲပြား။ ထို့နောက် သူသည် မိုက်ကရိုဖုန်းမှတစ်ဆင့် အင်မတန် ပီသသော ဗီယက်နမ် အသံထွက်ဖြင့် "ဗီယက်နမ် မွန်းနမ်! ဗီယက်နမ် မွန်းနမ်! ဗီယက်နမ် မွန်းနမ်!" ဟူ၍ ဟစ်ကြွေးလိုက်တော့သည်။

ထိုအခါ ထိုင်နေသူများအားလုံး ဝုန်းခနဲ မတ်တပ်ထရပ်လိုက်ကြသလို၊ မတ်တပ်ရပ်နေသူများမှာလည်း ပို၍ တက်ကြွသွားကြပြီး ကွန်ဂရက်လွှတ်တော်အမတ်၏ နောက်မှနေ၍ "ဗီယက်နမ်နိုင်ငံ ထာဝရတည်တံ့ပါစေ" ဟူသော ကြွေးကြော်သံကို ဟိန်းထွက်နေအောင် သံပြိုင်လိုက်အော်ကြလေသည်။

ထိုစဉ် ကလပ် ဂေဘယ်နှင့် တူသူက တီးဝိုင်းကို အချက်ပြလိုက်ရာ ကျွန်‌ တော် တို့၏ နိုင်ငံတော်သီချင်း စည်းဝါးသံများ ထွက်ပေါ်လာခဲ့သည်။ ထိုသီချင်းကို စင်ပေါ်ရှိ နတ်သမီး များ အလား မြူဆွယ် ဖျား‌ ယောင်း‌ နေသည့် အမျိုးသမီး နှစ်ဦး၊ ကလပ် ဂေဘယ် နှင့် လွှတ်တော်အမတ်တို့အားလုံး အားမန် အပြည့်ဖြင့် သီဆိုကြသလို ကျွန်‌ တော် အပါအဝင် ပရိသတ်အားလုံးကလည်း လိုက်ဆိုကြသည်။ သို့သော် စိတ်ခံစားချက် ကင်းမဲ့နေပုံရသည့် တရုတ် စားပွဲထိုးများကတော့ မဆိုကြ။ သူတို့ခမျာလည်း ထိုအချိန်ကျမှပဲ အနားရရှာလေတော့သည်။