လူပေါင်း ၂,၆၀၀ ကျော် အား သတ်ဖြတ်ခဲ့ပြီး ၁၇,၀၀၀ ခန့်အား ဖမ်းဆီးခံထားသည့် နိုင်ငံသည် ယူကရိန်းလည်း မဟုတ်၊ ပူတင် ကျုးလွန်ခဲ့သည်လည်း မဟုတ်ပဲ စစ်ရာဇဝတ်သားတဦး ဖြစ်သည့် မင်းအောင်လှိုင် ရက်စက်ကြမ်းကြုပ်စွာ အုပ်ချုပ်နေသည့် မြန်မာ နိုင်ငံပင် ဖြစ်နေသည် ကို တွေ့ရမည် ဖြစ်သည်။

မင်းအောင်လှိုင်သည် ကမ္ဘာပေါ်ရှိ မင်းဆိုးမင်းညစ် မှန်သမျှ တို့၏ လက်စွဲကျမ်းကို တလုံးမကျန် အာဂုံဆောင်ကာ ရက်စက်ကြမ်းကြုပ်လှသည့် လူသတ်မှုများ၊ စစ်ရေးပြပွဲများ၊ ၎င်းအား ဆန့်ကျင်သူ အားလုံး ကို ဖမ်းဆီး အကျဉ်းချခြင်း အစရှိသည့် အမှု များကို ကျုးလွန်နေပြီ ဖြစ်၍ ဒီမိုကရေစီ အတွက် တကမ္ဘာလုံး အတိုင်းအတာ ဖြင့် တိုက်ပွဲ ဆင်နွှဲရတော့မည့် စစ်မျက်နှာ ဖြစ်လာနေပြီဟု လန်ဒန် ရှိ ဇန်နဝါရီ ၈ ရက် နေ့ထုတ် ဂါဒီယန်း သတင်းစာကြီးမှ ဆိုင်မွန် တစ်ဒေါ် မှ ထောက်ပြ‌ရေးသားလာ ခဲ့သည်။

အာဏာရှင်တဦး၏ ကိုယ်ပေါ်တွင် ဆွဲချိတ်ထားသည့် အဓိပ္ပါယ် ကင်းမဲ့လှသည့် ရွှေစားလွယ်၊ ရွှေ ပြား များ ပိုများလာလေလေ ထိုပုဂ္ဂိုလ်သည် ယုတ္တိမဲ့စွာ နှင့် လွန်စွာ မှ ကြောက်မက်ဖွယ် ကောင်းသော အမှုများကို ကျုးလွန်လေပင် ဖြစ်သည်ဟု ယေဘုယျ အားဖြင့် သတ်မှတ်ထားလေ့ရှိသည်။ ယခု ထိုကဲ့သို့ ဆင်မြန်းထားသော မင်းအောင်လှိုင်သည် ကျေးရွာများ၊ စာသင်ကျောင်းများ၊ ဆေးရုံများ ကို ဗုံးကြဲ တိုက်ခိုက်နေသည့် အတွက် ကမ္ဘာက ကြုံတွေ့ခဲ့ရသမျှ ထဲတွင် အဆိုးဝါးဆုံး လူတ‌ဦး အဖြစ် မျက်စိရှေ့မှောက်တွင် ဘွားကနဲ ပေါ်ထွက်လာခဲ့ပြီ ဖြစ်သည်။

မင်းအောင်လှိုင်သည် မြန်မာ လူထု အများစုက တိတ်ဆိတ်စွာ သပိတ်မှောက်ထားသော ၇၅ နှစ်မြောက် လွတ်လပ်ရေး နေ့ အား စစ်ရေးပြပွဲကြီး ဖြင့် ပြုလုပ်လာပြီး ဒီမိုကရေစီ နည်းလမ်း ဖြင့် ရွေးချယ်တင်မြှောက်ခံထားရသည့် ခေါင်းဆောင် ဖြစ်သူ ဒေါ်အောင်ဆန်းစုကြည်အား အပြစ်ဒဏ်များ ထပ်မံ ချမှတ်ခဲ့ပြန်သည်၊ ထို့အပြင် အာဏာရှင်တို့၏ လက်စွဲကျမ်း အတိုင်း ၎င်းအား ဆန့်ကျင်သူများကို ဖယ်ထုတ်ထားမည့် အတုအယောင် ရွေးကောက်ပွဲ အား ပြုလုပ်ရန် စီစဉ်လာခဲ့ပြန်သည်။

၎င်းအား မှုန်တေတေ ဖြင့် စောင့်ကြည့်နေခဲ့သည့် တနိုင်ငံလုံး ရှိ လူထုအား မိန့်ခွန်းချွေရာတွင် အီးယူ၊ အမေရိကန် နှင့် ဗြိတိန် တို့၏ စီးပွားရေး ပိတ်ဆို့မှု များ တွင် ပူးပေါင်းခြင်း မရှိခဲ့သည့် နိုင်ငံများ ကို ကျေးဇူး ဥပကာရ တင်ရှိကြောင်း ထည့်သွင်း ပြောဆိုသွားခဲ့သည်။ တကယ်တမ်း ၎င်း၏ ကျေးဇူးတင်ခံရသည့် စာရင်းထဲတွင် ပါသွားရှာသည့် နိုင်ငံများ ဖြစ်သည့် တရုတ်၊ အိန္ဒိယ၊ ထိုင်း၊ လာအို နှင့် ဘင်္ဂလားဒေ့ရှ် တို့ အဖို့ ရှက်ဖွယ်လိလိ ကဗ္ဗည်းတင်ခံလိုက်ရသည့် roll call of shame စာရင်းထဲတွင် ပါသွားခဲ့သည်ကိုတော့ ရိပ်စားမိဟန် မတူပေ။ ၎င်း အား လက်နက်များ ရောင်းချပေးနေသည့် အဓိက နိုင်ငံ ဖြစ်သည့် ရုရှားကိုလည်း မမေ့မလျော့ ထည့်သွင်း ပြောဆိုသွားခဲ့ပြန်သည်။

သို့သော် မင်းအောင်လှိုင် သည် ၎င်း၏ အဖွဲ့ အာဏာ ဆုပ်ကိုင်ထားမှုသည် ပြည်သူ့ကာကွယ်ရေး တပ်ဖွဲ့ (PDF) နှင့် တိုင်းရင်းသား လက်နက်ကိုင် အဖွဲ့အစည်း (EAO) များမှ နိုင်ငံ‌ရေး နှင့် လက်နက်ကိုင် ခုခံ တွန်းလှန်မှု ဆိုသည့် သွားကြီး များ ဖြင့် တိုး၍ တိုး၍ ကိုက်ဖြတ် ခြင်း ခံနေရ၍ အားပျော့လာနေပြီ ဆိုသည်ကိုတော့ ထည့်သွင်း ပြောဆိုဖို့ ပျက်ကွက်ခဲ့သည်။

မင်းအောင်လှိုင် နှင့် အဖွဲ့ သည် ထိုအဖြစ်သနစ်များ အား လွတ်လပ်စွာ သတင်း ထုတ်ပြန်ခွင့်ကို ဖိနှိပ်ချုပ်ချယ်ကာ ဖုံးဖိထားရန် ကြိုးပမ်းခဲ့သော်ငြားလည်း ၎င်းတို့၏ ရက်စက်စွာ ကျုးလွန်ခဲ့မှုများကြောင့် နိုင်ငံ တဝက် နီးပါး လက်နက်ကိုင် ပုန်ကန် မှုများသည် ပျောက်ပျက်သွားတော့မည် ကား မဟုတ်ပေ။ ထိုတော်လှန်ရေး တပ်ဖွဲ့များ အောင်မြင်စွာ တွန်းလှန်နိုင်ရေးသည် ညီညွတ်သော တပ်ပေါင်းစု ဖွဲ့စည်းနိုင်မှသာ ဖြစ်မည်ဟု အမေရိကန် သံအမတ်ဟောင်း စကော့ မာစီယယ်က ထောက်ပြ အကြံပြုသွားခဲ့သည်။

“စစ်ကောင်စီသည် ၎င်းတို့ ကျုးလွန်နေသော လူမဆန်သည့် ရက်စက်ကြမ်းကြုပ်မှုများကြောင့် အချိန်အတိုင်းအတာ တခုအထိ တည်မြဲနေနိုင်သော်လည်း ရှေ့လျှောက် နိုင်ငံကို ထိရောက်စွာ အုပ်ချုပ်သွားနိုင်ရေး နှင့် လူထု၏ ထောက်ခံမှု တမျိုးမျိုး ရရှိလာရေး တို့ ရရှိလာမည့် အထောက်အထား တခုတလေမျှပင် မတွေ့ရ” ဟု မာစီယယ်က ဆိုသည်။

မြန်မာ ပြည်သူများ အတွက် အကူအညီများ လိုအပ်နေပြီ ဆိုသည်ကား သိသာထင်ရှားနေသည်။ ထိုအနေအထားတွင် “နိုင်ငံတကာ အသိုက်အဝန်း” အနေဖြင့် ဘာတွေ ထပ်လုပ်ပေးဖို့ ရှိနေလဲ ဆိုသည့် မေးခွန်းထွက်ပေါ်လာခဲ့သည်။ ဗြိတိန်၏ နိုင်ငံခြားရေး ဝန်ကြီး အသစ် ဖြစ်လာသူ ဂျိမ်းစ် ကလဲဗားလီ သည် ဂါဒီယန်း သတင်းစာကြီးတွင် ဗြိတိန်၏ အရေးယူ ပိတ်ဆို့မှုများနှင့် ပတ်သက်၍ ကြွားလုံး ထုတ်ခဲ့သော်လည်း ၎င်းတို့ နှစ်ပေါင်းများစွာ အမှန်တကယ် ယုံယုံကြည်ကြည် နှင့် ကြိုးပမ်းအားထုတ်ခဲ့မှုများသည် အများအားဖြင့် ထိရောက်မှု မရှိခဲ့သည်ကို သက်သေပြခဲ့ပြီး ဖြစ်သည်။

ထုံးစံအတိုင်းပင် မျှော်လင့်ချက်များ က အမေရိကန် တို့ထံ စုပြုံလာခဲ့ပြီ ဖြစ်သည်။ အမေရိကန် ၏ ၂၀၂၃ နိုင်ငံ ကာကွယ်‌ရေး အသုံးစရိတ် NDAA တွင် မြန်မာ တော်လှန်ရေး အဖွဲ့အစည်းများ၊ နိုင်ငံရေး အကျဉ်းသားများ နှင့် အရပ်ဖက် အဖွဲ့အစည်းများအား လူ့အသက် အန္တရာယ် မထိခိုက်နိုင်သော အကူအညီ နှင့် ရံပုံငွေများ ထောက်ပံ့သွားရန် ပါရှိလာခဲ့သည်။ သို့သော် အိမ်ဖြူတော် အနေဖြင့် ‌အကြောင်းပေါ်လာခဲ့လျှင် ရှေ့လျှောက် ဘာဆက်လုပ်လာမည် လဲ ဆိုသည်ကား မသဲကွဲလှပေ။

ကမ္ဘာကြီးသည် မြန်မာပြည်သူတို့၏ ဒုက္ခဆင်းရဲ နှင့် ကြုံတွေ့နေရမှုနှင့် မင်းအောင်လှိုင်ကို တကယ်တမ်း အဆုံးသတ်ပေးလိုလျှင် သီအိုရီ အတိုင်း ဆိုက တရုတ် ကို ချည်းကပ်ခြင်းသည်သာ အကောင်းဆုံးပင် ဖြစ်သည်။ တရုတ်သည် မြန်မာနိုင်ငံ အတွင်း စီးပွားရေး နှင့် အခြေခံ အဆောက်အအုံ ပိုင်းများ တွင် အကြီးအကျယ် ရင်းနှီးမြုပ်နှံထား၍ မြန်မာ အပေါ် မည်သူမျှ မယှဉ်နိုင်သည့် ဩဇာသက်ရောက်နိုင်စွမ်း ရှိသည့် တခုတည်းသော နိုင်ငံ ဖြစ်သည်။ တရုတ်သည် ဒီမိုကရေစီ ဆိုသည်ကို ဂရုစိုက် ခြင်း မရှိလှသော်လည်း ၎င်း၏ နယ်စပ်တဖက်တွင် ရေရှည် မတည်မငြိမ် ဖြစ်လာမည့် အရေးသည် သူ့အတွက် မည်သို့မျှ အကျိုးမရှိ ဆိုသည်ကို သိနားလည် ထားပြီး ဖြစ်သည်။

ထိုအတွက် ပြီးခဲ့သည့် လ အတွင်း ကုလ လုံခြုံရေး ကောင်စီ ၏ အဆို ကို ဗီတိုဖြင့် မကန့်ကွက်ခဲ့ခြင်းသည်လည်း မူအားဖြင့် မဟုတ်ပဲ ကိုယ်ကျိုးသက်သက်ဖြင့် တွက်ချက် ဆုံးဖြတ်ခဲ့ခြင်း သာ ဖြစ်သည်။ ဘီဂျင်း ကို ကြည့်ပြီး ရုရှားသည်လည်း ထိုအဆို အပေါ် ကြားနေလာခဲ့သည်။

ယခု အခက်ခဲဆုံး အပိုင်း က စစ်အာဏာသိမ်း အဖွဲ့ လိုက်လျောလာစေရန် မည်သို့ မည်ပုံ လုပ်ကြမည်နည်း ဆိုသည်ပင် ဖြစ်သည်။

ကုလသမဂ္ဂသည်လည်း မြန်မာ တော်လှန်ရေး အင်အားစုများလို ညီညွတ်သော တပ်ပေါင်းစု ရှိနေဖို့ လိုသည်။ အလုပ်ဖြစ်ရန် အိန္ဒိယ ကို ဆွဲခေါ်ရမည် ဖြစ်သည်၊ အိန္ဒိယ သည် ယူကရိန်းကဲ့သို့ပင် မြန်မာ အရေးတွင် ကိုယ့်ကျင့် တရားထက် ငွေကိစ္စကို ရှေ့တန်းတင်ခဲ့သူ ဖြစ်သည်။ ထို့အပြင် သန်းချီနေသော ရိုဟင်ဂျာ ဒုက္ခသည်များ အရေး ကို မနိုင်ရင်ကာ ဖြေရှင်းနေရသော ဘင်္ဂလားဒေ့ရှ်၊ ထိုင်း နှင့် အာဆီယံ နိုင်ငံများကိုလည်း စည်းရုံးရမည် ဖြစ်သည်။

အာဆီယံသည် အကွဲအပြဲများ ဖြစ်လာပြီး ငါးချက်ပါ ငြိမ်းချမ်းရေး အစီအစဉ်များ ရပ်ဆိုင်းသွားခဲ့သည်။ ၎င်းတို့အထဲတွင် အချို့က အာဏာသိမ်း အဖွဲ့၏ အတုအယောင် ရွေးကောက်ပွဲသည် ၎င်းတို့ အတွက် အသိအမှတ်ပြု ဆက်ဆံလို့ရသည့် ကာဗာ ဖြစ်လာနိုင်သည်ဟုပင် စိတ်ကူးယဉ် နေသူများ ရှိလာသည်။ ရိုဟင်ဂျာ ဒုက္ခသည်များ မကြာမီက ပင်လယ်ထဲ မျောနေသည် ကိုပင် အများစုက တုံဏှိဘာဝေ လုပ်လာကြသည်။

ကုလ လုံခြုံရေး ကောင်စီ အဆိုတွင် လက်နက် ရောင်းချမှု ပိတ်ဆို့ရေး မပါဝင်ခဲ့သည်ကို Burma Campaign (UK) ကဲ့သို့ အဖွဲ့များက မကျေမနပ် ပြောဆိုလာခဲ့ကြသည်။

လောလောဆယ် အရှိန်ရလာနေသည်ကို ဆက်လက် ထိန်းသိမ်းထားနိုင်ရန် ဗြိတိန် နှင့် အခြား အစိုးရများ အား လေကြောင်းမှ တိုက်ခိုက်မှု များ ရပ်တန့်ရန် လေယာဉ်ဆီများ ပိတ်ဆို့ပေးရေးပါ တိုက်တွန်းလာကြသည်။ ကုလ၏ နိုင်ငံတကာ တရားရုံးတွင် ရိုဟင်ဂျာ များအပေါ် လူမျိုးတုံး သတ်ဖြတ်ခဲ့မှု အား ဥပဒေကြောင်းအရ အရေးယူရန် ဆောင်ရွက်နေသော်လည်း အမှုပြီးဖို့ ဆိုသည်က နှစ်ပေါင်းများစွာ အချိန်ယူရဦးမည် ဖြစ်သည်။

စစ်အာဏာသိမ်း အဖွဲ့ကို အခြား မည်သူက ဟန့်တား နိုင်စွမ်း ရှိပေသနည်း။ စစ်အာဏာရှင်များကတော့ “ဗုဒ္ဓဘာသာ၏ အကြမ်းဖက် မျက်နှာစာ” ဟု ကင်ပွန်းတပ်ခံခဲ့ရသည့် တဖက်စွန်းရောက် ဝီရသူ အား ဆုချီးမြှင့်ပေးလိုက်ခြင်းဖြင့် ဗုဒ္ဓဘာသာဝင်များ အကြား စည်းရုံးနိုင်ရန် တစိုက်မတ်မတ် ကြိုးစားလာနေသည်။

ခရစ်ယာန် ဘာသာရေး ခေါင်းဆောင်များ ဖက်ကလည်း ရန်ကုန်တွင် မင်းအောင်လှိုင် နှင့် အတူ ခရစ်စမတ် ပွဲတော် အတူ ဆင်နွှဲလာခြင်းကြောင့် စိတ်ပျက်ဖွယ် ဖြစ်လာခဲ့ရသည်။ ဂိုဏ်းချုပ်ဆရာတော် ချားလ်မောင်ဘို သည် သူ၏ မွေးရပ်မြေ အား မင်းအောင်လှိုင်၏ မုန်တိုင်း တပ်ဖွဲ့များ ဝင်ရောက် စီးနင်း တိုက်ခိုက်ခဲ့မှု နှင့် ဘုရားကျောင်းများအား မီးတိုက် ဖျက်ဆီးနေမှုများကို ခွင့်လွှတ်ပေးနေပုံရသည်။

အချုပ်အားဖြင့် ဆိုရက ကမ္ဘောဒီယား ၏ ခမာနီ များ နောက်ပိုင်း ဒေသ အတွင်း အဆိုးရွားဆုံး အဖွဲ့အစည်း အဖြစ် ထွက်ပေါ်လာခဲ့သည့် မြန်မာ စစ်အာဏာသိမ်း အဖွဲ့အား ဖြုတ်ချရန် သက်ဆိုင်သူများ၊ ပြည်တွင်း ပြည်ပ အတူ ပူးပေါင်းဆောင်ရွက်ကြရမည် ဖြစ်သည်။

ပို၍ ရှင်းလင်းပြတ်သားစွာ ထွက်ပေါ်လာခဲ့ရသည်က မြန်မာ သည် ကမ္ဘာကြီး အနေဖြင့် နှစ်ဆယ့်တစ်ရာစု အတွင်း ဒီမိုကရေစီ၊ တရားမျှတမှု နှင့် လူမှု လွတ်လပ်ခွင့်များ ဆက်လက် ထွန်းကားရေး အတွက် ပြတ်ပြတ်သားသား တိုက်ပွဲဝင်ရမည့် နေရာလည်း ဖြစ်လာနေပြီ ဆိုခြင်းပင်။

ပြည်သူတို့၏ ခုခံ တွန်းလှန်စစ် မုချအောင်ရမည်!!!