ကာဆန် ဆူလေမာနီး အလွန် အရှေ့ အလယ်ပိုင်း အနေအထား

by Hla Soewai - Jan 05 2020

အီရန် ဘာသာရေး ခေါင်းဆောင် အယာတိုလာ အလီ ခါမေနီ၏ လက်ရုံး၊ အီရန်၏ နိုင်ငံခြားရေး၊ ကာကွယ်ရေး သာမက အရှေ့ အလယ်ပိုင်း တခွင် အာဏာစက် ဖြန့်ကြက်နိုင်ခဲ့သည့် အစွမ်းထက်ခဲ့သော ဗိုလ်ချုပ်ကြီး ကာဆန် ဆူလေမာနီးအား ဆီရီယားမှ အပြန် ဘဂ္ဂဒက် လေဆိပ်တွင် အမေရိကန် Reaper Drone နဲ့ ပြစ်ခတ် ချေမှုန်းခြင်း ခံခဲ့ရတာ အားလုံး သိပြီး ဖြစ်ပါတယ်။

 

ယင်းနှင့် အတူ အရှေ့အလယ်ပိုင်း အခြေအနေသည် ခန့်မှန်း၍ ခက်ခဲလှအောင် တင်းမာမှုတွေ အရှိန်မြင့်တက်သွားခဲ့ရမှု နှင့်အတူ ရေနံဈေးကလည်း နှစ်ဒေါ်လာ နီးပါး ခုန်တက်သွားပြီး ဒေါ်လာ ၇၀ နား ကပ်သွားခဲ့ပါတယ်။

 

အဓိက ကတော့ သူ့နေရာကို ဆက်ခံမယ့် လက်ထောက် ဖြစ်ခဲ့သူ အက်စ်မေးလ် ကာနီ မှ (သူ့အား ဆူလေမာနီး လုပ်ကြံခံရပြီး ၁၂ နာရီ အတွင်း အစားထိုးခဲ့တာ ဖြစ်ပါတယ်) မည်သို့မည်ပုံ တုန့်ပြန်လာမလဲ ဆိုတာ ဖြစ်ပါတယ်။ အမေရိကန်ရှိ လေ့လာသူများကတော့ ဒေါ်နယ် ထရန့် ရဲ့ မစူးစမ်း မဆင်ခြင်ပဲ ပြဿနာကို ဖန်တီးလိုက်မှု လို့ ငြည်းတွားနေကြပါတယ်၊

 

 

အီရန် အနေနဲ့ အမေရိကန်နဲ့ ထိတ်တိုက်ရင်ဆိုင်ဖို့ က ကြိမ်းသေ အရေးနိမ့်မှာ ဖြစ်တဲ့ အတွက် ဒီလမ်းကို ရွေးချယ်မှာ မဟုတ်တာကတော့ ကြိမ်းသေပါတယ်၊ ထို့အတွက် ဗိုလ်ချုပ်ကြီး ဆူလေမာနီး အနှစ်နှစ် အလ လ ပျိုးထောင်ပေးခဲ့တဲ့ လမ်းကြောင်း အတိုင်း လိုက်ပြီး ပင်လယ်ကွေ့ နိုင်ငံများရှိ အခြေခံ အဆောက်အအုံများကို အခြေအနေ ပေးရင် ပေးသလို တိုက်ခိုက်ခြင်း၊ အစ္စရေး ပြစ်မှတ်များကို တိုက်ခိုက်ခြင်း တွေ ရွေးချယ် ပြုလုပ်သွားဖို့ ရှိနေပါတယ်။ အီရတ် နဲ့ အခြား ဒေသတွေမှာ ရှိတဲ့ အမေရိကန် သံတမန် များ နဲ့ စစ်မှုထမ်းများကို လက်တုန့်ပြန် တိုက်ခိုက်သွားဖို့လည်း ရှိနေပါတယ်။

 

ထိုကဲ့သို့သော လုပ်ရပ်များက အသစ်အဆန်းတော့ မဟုတ်ပဲ အီရန်နှင့် သူ၏ ကြားခံ မဟာမိတ် လက်နက်ကိုင်တွေက နှစ်ပေါင်းများစွာ လုပ်လာနေခဲ့ပြီးလည်း ဖြစ်ပါတယ်၊ ထရန့်က လက်တုန့်ပြန်ဖို့ လက်နှေးနေခဲ့တာ ဖြစ်တဲ့အပြင် အီရန် ခေါင်းဆောင်များနဲ့ ပင် ဆွေးနွေးဖို့ ကမ်းလှမ်းခဲ့ပြန်ပါတယ်၊ အနီးစပ်ဆုံး ဖြစ်ရပ်ကတော့ အမေရိကန် ဒရုန်းတစင်းကို ဇွန်လ အတွင်း အီရန်တို့က ပြစ်ချခဲ့ပြီးနောက် အီရန်ကို လေကြောင်းမှ လက်တုန့်ပြန် တိုက်ခိုက်ဖို့ အမိန့်ပေးပြီးကာမှ နောက်ဆုံးအချိန်တွင် ပယ်ဖျက်လိုက်တာ ဖြစ်ပါတယ်။ ဆော်ဒီ အာရေဗီယားက ရေနံချက် စက်ရုံများကို စက်တင်ဘာလ အတွင်း ဒုံးကျည်များနဲ့ ပြစ်ခတ်တိုက်ခိုက်ခဲ့မှုကိုလည်း လက်တုန့်မပြန်ပဲ ကြည့်နေခဲ့ပြန်ပါတယ်။ ထိုသို့ မလှုပ်မရှား အနေအထားကနေ ယခုလို ဗြုန်းစားကြီး တင်းမာမှုကို အမြင့်ဆုံး အနေအထား မြှင့်တင်လိုက်တာလည်း ဖြစ်ပါတယ်။

 

အမေရိကန် နိုင်ငံခြားရေး ဝန်ကြီး မိုက် ပွန်ပီယိုကတော့ ကမ္ဘာကြီးက ယခုအခါ ပို၍ ဘေးအန္တရယ် ကင်းသွားပြီး ဒေသတွင်းရှိ အမေရိကန်တို့ အဖို့ လုံခြုံ စိတ်ချမှု ရှိသွားခဲ့ပြီလို့ ပြောဆိုခဲ့ပေမယ့် သူရဲ့ နိုင်ငံခြားရေး ဝန်ကြီးဌာနက တော့ အမေရိကန်နိုင်ငံသားများကို လေယာဉ်လမ်း သို့မဟုတ် ကုန်းလမ်း ခရီးနဲ့ အီရတ်ကနေ အမြန်ဆုံး ထွက်ခွာဖို့ ပြောဆိုထားပါတယ်။

 

အစ္စရေး ဝန်ကြီးချုပ် နာတန်ယာဟူးကတော့ သူ၏ ဂရိနိုင်ငံ ခရီးစဉ် မှ လှည့်ပြန်လာပြီး အစ္စရေး တပ်တွေကို အဆင့်အမြင့်ဆုံး အနေအထားနဲ့ တပ်လှန့်လိုက်ပြီ ဖြစ်ပါတယ်။

 

တဖက်နဲ့ တဖက် အဆုံးမသတ်နိုင်ပဲ အပြန်အလှန် လက်စားချေမှုများထဲ ကျရောက်သွားမယ့် အရေးကို အမေရိကန်တို့က စိုးရိမ်လာနေပါတယ်၊ တီဟီရန် ရှိ မူလာ များကတော့ သူတို့ ဂုဏ်သိက္ခာ မကျရေးလောက်ပဲ စိတ်ဝင်စားသူတွေ ဖြစ်ကြပါတယ်၊ နောက်ပိုင်းမှာ ဒေါ်နယ် ထရန့် အနေအထားကို ကြည့်ပြီး ယုံကြည်မှုတွေ မြင့်တက်လာပုံ ရှိပါတယ်၊ ဒီအတွက်လည်း  ဆော်ဒီ ရေနံစခန်းများနဲ့ ပါရှား ပင်လယ်ကွေ့အတွင်း ရေနံတင် သင်္ဘောများ နဲ့ စစ်သင်္ဘောတွေကို တိုးပြီး နှောက်ယှက်လာခဲ့ကြတာ ဖြစ်ပါတယ်။

 

အကယ်၍ အီရန် တော်လှန်းရေး အစောင့်တပ်က လက်တုန့်ပြန်လာခဲ့ရင် ထရန့်မှ ဘယ်လို တုန့်ပြန်လာမလဲ ဆိုတာ ဘယ်သူမှ မခန့်မှန်းနိုင် ဖြစ်နေပါတယ်။ အခု လောလောဆယ်တော့ အီရန် ခေါင်းဆောင်များက လက်တုန့်ပြန် မှာ မဟုတ်သေးပဲ နိုင်ငံတွင်း အမျိုးသားရေး အုံကြွလာမှုကြီး ဖြင့် သူတို့ အပေါ် ထောက်ခံလာကြမယ့် အရေး ကို အရှိန် မြင့်သည်ထက် မြင့်အောင် မြှင့်တင်ဖို့ ပဲ အားသန်နေပုံ ရှိပါတယ်။ ထို့အပြင် ၎င်းတို့ ကာလကြာမြင့်စွာ ရည်မှန်းချက် ဖြစ်ခဲ့တဲ့ အမေရိကန် တပ်များ အီရတ်မှ ရုတ်သိမ်းသွားဖို့ကို သေနတ်တချက်မှ မဖေါက်လိုက်ရပဲ အောင်မြင်စွာ အကောင်အထည် ဖေါ်နိုင်တော့မယ် ဆိုတဲ့ အမြတ် ထွက်လာဖို့ ရှိနေပါတယ်။

 

 

အီရန် ဘာသာရေး ခေါင်းဆောင်တွေ အပေါ် လူထုက အမြင်မကြည်လင်ကြပေမယ့် ဗိုလ်ချုပ်ကြီး ဆူလေမာနီးကိုတော့ လူကြိုက်များ တာ တွေ့ရပါတယ်၊ အဓိက ကတော့ အီရန် နိုင်ငံအတွင်း အိုင်အက်စ်တွေ ခြေမချနိုင်အောင် လုပ်နိုင်ခဲ့လို့ပဲ ဖြစ်ပါတယ်၊ သို့သော် ဆူလေမာနီးက ပြည်တွင်းရှိ အတိုက်အခံ များကို အပြင်းအထန် နှိပ်ကွပ်ခဲ့သူ ဖြစ်နေပြန်ပါတယ်။

 

 

အမေရိကန်တွေဖက်ကလည်း အီရတ်မှာ အမြဲလို နေသွားဖို့က မဖြစ်နိုင်ပါဖူး၊ လောလောဆယ်မှာ အီရန် လိုလားတဲ့ ဥပဒေပြု အမတ်တွေက အမေရိကန်တွေကို နိုင်ငံတွင်းမှ မောင်းထုတ်ဖို့ လိုလားနေကြပါတယ်၊ အဲ့ဒီလို မောင်းမထုတ်ရင်တောင်မှ ရန်လိုမှု တွေ များပြားလာနေတဲ့ နိုင်ငံမှာ အမေရိကန် တပ်တွေ ဆက်ထားဖို့ အခက်ကြုံလာနေပြီ ဖြစ်ပါတယ်၊

 

အီရတ်က ရုတ်သိမ်းသွားခဲ့ရင် ဆီရီယားရှိ အမေရိကန်တပ်များ အတွက် ထောက်ပံ့ရေး လမ်းကြောင်း ပိတ်ဆို့သွားနိုင်ပါတယ်၊ ထို့အပြင် အိုင်အက်စ်တွေ အဖို့ အီရတ် လွင်ပြင်တကြော လူပြန်စု ဖို့ အနေအထားတွေ ဖြစ်လာနိုင်ပါတယ်၊ အမေရိကန် သံတမန်တွေ နဲ့ စပိုင်တွေ ဖက်ကလည်း ဆူလေမာနီး အဖွဲ့တွေ အရင်ကလုပ်သလို ပြန်ပေးဆွဲတာမျိုး၊ လုပ်ကြံခံရနိုင်တာမျိုးကို စိုးရိမ်လာနေပါတယ်။ အီရတ်မှာ ရှိတဲ့ အမေရိကန်ရေနံ ကုမ္ပဏီကြီးတွေလည်း အလားတူ စိုးရိမ်မကင်း ဖြစ်လာနေပါတယ်။

 

ဆောက်လုပ်ရေး လုပ်ငန်းခွင်ထဲမှာ ပိန်ပိန်ညှောင်ညှောင် ကလေး အလုပ်သမားလေး ဘဝကနေ အရှေ့အလယ်ပိုင်းတွင် တန်ခိုး အထွားဆုံး ပြိုင်ဖက်မရှိ တပ်မှုးကြီး ဘဝကို တက်လှမ်းလာခဲ့တဲ့ ကာဆန် ဆူလေမာနီး က စစ်မျက်နှာပြင် အားလုံးမှာ သူ့ခြေသူ့လက် ဖြစ်လာခဲ့ပါတယ်။ ဒီအတွက် အီရန်ရှိ အာယာတိုလာတွေကို စစ်ရေးနဲ့ နိုင်ငံခြားရေး မူဝါဒပိုင်းမှာ  သူရဲ့ ဩဇာ ကို မလွန်ဆန်နိုင်ကြတာမို့ အီရန် ရဲ့ ခေါင်းဆောင် တနေ့ ဖြစ်လာနိုင်တယ်လို့ တောင် ခန့်မှန်းနေကြပါတယ်။

 

အမေရိကန်တို့ အား ၎င်းတို့ ဒေါ်လာသန်း တြီလီယံ ပေါင်း များစွာ သုံးပြီး ဆင်နွဲခဲ့ရတဲ့ အီရတ် ကနေ ၂၀၁၁ ခုနှစ်မှာ ရုတ်သိမ်းသွားရအောင် ဆူလေမာနီးက ဖန်တီးနိုင်ခဲ့ပြန်ပါတယ်။ ဒါ့အပြင် ဆီရီယား သမ္မတ ဘာရှာ အယ် အာဆတ် ကို ပြုတ်မကျသွားအောင် ကျားကန်ပေးနိုင်ခဲ့ပြန်ပါတယ်။ အီရတ်ကိုလည်း အိုင်အက်စ် တို့ သိမ်းပိုက်ခံရမယ့် အရေး မှ ကာကွယ်ပေးနိုင်သူ ဆိုပြီး အီရတ်ပြည်သူများရဲ့ လေးစားမှု ခံခဲ့ရပြန်ပါတယ်။

 

အခုလို သူ့ကို သတ်ဖြတ်ခဲ့မှုသည် အိုစမာ ဘင်လေဒင်၊ အဘူ ဘက်ကာ အယ် ဘာဂါဒီ တို့ ထက်ပင် အရှေ့အလယ်ပိုင်း တခွင် သိမ့်သိမ့်တုန်သွားခဲ့ရပါတယ်၊ အဆိုပါ ပုဂ္ဂိုလ်များက အမည်မျှသာ ကျန်တော့သည့် အဖွဲ့များ၏ ခေါင်းဆောင်များ ဖြစ်နေသောကြောင့်ပင်၊ ဆူလေမာနီးကတော့ သူ၏ တန်ခိုးအာဏာ လှမ်းလှမ်းတောက် နေရသည့် အချိန်တွင် သုတ်သင်ခံလိုက်ရခြင်း ဖြစ်နေပါတယ်။

 

လက်ရှိ အနေအထား အရတော့ အမေရိကန်တို့ရဲ့ ရည်မှန်းချက် ဖြစ်တဲ့ အီရန် ကို ရန်မလိုအောင် ထိမ်းထိမ်းသိမ်းသိမ်း လုပ်သွားနိုင်မလား ဆိုတာကတော့ ဖြစ်နိုင်ခြေ နည်းသွားခဲ့ပြီ ဖြစ်ပါတယ်။ အမေရိကန် တို့ အီရန် နျုကလီယား စီမံကိန်းကို ထိမ်းချုပ်နိုင်ရေး တဖန်ပြန်ပြီး စေ့ဆပ်ဆွေးနွေးနိုင်ဖို့နဲ့ ဆိုးဝါးလာနေတဲ့ ပဋိပက္ခတွေကို သံတမန်ရေး အရ အဖြေရှာနိုင်ဖို့ ဆိုသည်များက ဗိုလ်ချုပ်ကြီး ကာဆန် ဆူလေမာနီး နဲ့ အတူ ပျောက်ကွယ် သွားရပြီ ဖြစ်ပါတယ်။

 

ဆူလေမာနီး ရဲ့ ဘဝ ဖြစ်စဉ်

 

အသက် ၆၂ နှစ် ရှိပြီ ဖြစ်တဲ့ ဆူလေမာနီးသည် ချမ်းသာကြွယ်ဝသော မိဘမျိုးရိုးမှ ဆင်းသက်လာခဲ့သူ မဟုတ်ပါဖူး၊ အီရန် အရှေ့ပိုင်း ရာဘော့ဒ် ဆိုတဲ့ ရွာလေးရှိ လယ်သမား မိသားစုမှ ကြီးပြင်းလာခဲ့သူ ဖြစ်ပါတယ်၊  ထိုစဉ် က မသင်မနေရ မူလတန်း ပညာရေး စနစ်ကြောင့် ငါးတန်းအထိ ပညာသင်ယူခဲ့ပါတယ်၊ အသက်ဆယ်သုံးနှစ်အရွယ်  ရွာနဲ့ နီးတဲ့ ကာမင်း မြို့ကို တက်ပြီး မိသားစု တင်နေတဲ့ လယ်စားရိတ် အကြွေး ဒေါ်လာ တရာ ခန့် ကို ဆပ်နိုင်အောင် ဆောက်လုပ်ရေး လုပ်ငန်းခွင်ထဲ ကလေး အလုပ်သမား အဖြစ် ဝင်ရောက် လုပ်ကိုင်ခဲ့ရပါတယ်။

 

နောက်ပိုင်း မြို့တော် ရေပေးဝေရေး ဘုတ်အဖွဲ့ ထံမှာ အလုပ်တခု ရပါတယ်၊ အားလပ်ချိန်တွင် အလေးမခြင်း၊ ဗလီတက်ပြီး အစွန်းရောက် တရားဟောဆရာများရဲ့ တရားများကို နားထောင်ခြင်းဖြင့် အချိန်ဖြုန်းခဲ့ပါတယ်။

 

ရှားဘုရင် နန်းကျပြီးနောက်ပိုင်းမှာ အီရန် တော်လှန်ရေး အစောင့်တပ်ထဲ ဝင်ရောက်ခဲ့ပါတယ်။ တော်လှန်ရေး အစောင့်တပ် ဆိုတဲ့ သဘောကတော့ စစ်တပ်မှ အစိုးရကို အာဏာသိမ်းမှာမျိုးကို တန်ပြန် ချေမှုန်းနိုင်ရန် အထူး သီးသန့် ဖွဲ့စည်းခဲ့တဲ့ လက်နက်ကိုင် အဖွဲ့အစည်းပဲ ဖြစ်ပါတယ်၊ သူ့အတွက် စစ်သင်တန်း တက်ခဲ့ရတဲ့ အချိန်က နှစ်လပဲ ကြာမြင့်ခဲ့ပါတယ်၊

 

ပထမဆုံး တာဝန်ချထားပေးခြင်း ခံခဲ့ရတာကတော့ နိုင်ငံ အနောက်မြောက်ပိုင်းရှိ ကပ်ဒ် ခွဲထွက်ရေး သမားများကို နှိမ်နှင်းတဲ့ စစ်ဆင်ရေး တွေ မှာ ဖြစ်ပါတယ်၊ နောက်ပိုင်း ပြင်းထန်လှတဲ့ အီရန်-အီရတ် စစ်ပွဲထဲ ဝင်ရောက်ခဲ့ရပါတယ်။ ဒီအတွက် စစ်မြေပြင် အတွေ့အကြုံတွေ ရင့်ကျက် ပြည့်ဝလာခဲ့ပါတယ်။ စစ်မြေပြင်ကိုလည်း “လူသားမျိုးနွယ်တို့ ၏ ဆုံးရှုံးသွားသော နိဗ္ဗာန်ဘုံ”လို့ အမြဲပြောဆိုလေ့ ရှိသူ ဖြစ်ပါတယ်။

 

အီရန်-အီရတ် စစ်ပွဲ ပြီးဆုံးသွားချိန်မှာတော့ အာဖဂန်နစ္စတန် နယ်ခြား ဘိန်းကုန်ကူးမှုတွေ တိုက်ဖျက်တဲ့ စစ်ဆင်ရေး တွေ မှာ တာဝန်ပေးခြင်း ခံခဲ့ရပါတယ်။ ထူးချွန်ပြောင်မြောက်စွာ လုပ်ကိုင်နိုင်ခဲ့တာမို့ ရာထူးတက်လာခဲ့ပြီး ကွပ်စ် (Quds) တပ်ဖွဲ့ အကြီးအကဲ အဖြစ် ခန့်အပ်ခံခဲ့ရပါတယ်။ ကွပ်စ် ဆိုတဲ့ အမည်က ဂျေရုစလင်ကို အာရပ်ဘာသာ နဲ့ ခေါ်ဆိုခြင်း ဖြစ်တာမို့ အဆိုပါ အဖွဲ့ရဲ့ တာဝန်က အထူးပြောနေစလို မလိုတော့ပါဖူး၊ ဂျေရုဆလင်ကို သိမ်းရန် ရည်မှန်းချက်နဲ့ ဖွဲ့စည်းခဲ့တဲ့ အထူး တပ်ဖွဲ့၏ ပထမခြေလှမ်းကတော့ အရှေ့အလယ်ပိုင်းမှာ အာဏာစက်ပျံ့နှံ့အောင် လုပ်ဖို့ပဲ ဖြစ်ပါတယ်။

 

ဒီအတွက် လက်ဘနွန် တွင် ခိုမေနီ မွေးဖွားပေးခဲ့သည့် ဟစ်ဘိုလာ အဖွဲ့ ကို နောက်ကွယ်မှ ဦးဆောင် ကြိုးကိုင်လာပြီး လုပ်ကြံသတ်ဖြတ်မှုများ၊ အသေခံ ဗုံးခွဲမှုများ ကျုးလွန်ခဲ့ပါတယ်။ ဆူလေမာနီး ရဲ့ အထင်ရှားဆုံး လုပ်ရပ်များကတော့ လက်ဘနွန် ဝန်ကြီးချုပ် ရာဖစ် ဟာရီရီ ကို လုပ်ကြံသတ်ဖြတ်မှု၊ အစ္စရေး သံရုံးကို ဗုံးခွဲခဲ့မှုနှင့် ဗြူနိုအေရီစ်ရှိ ဂျုး စင်တာ ကို ဗုံးခွဲခဲ့မှုတို့ပဲ ဖြစ်ပါတယ်။ မော့ဆက်က လုပ်ကြံဖို့ ကြိုးစားခဲ့ပေမယ့် အစိုးရ အရာရှိကြီး တဦး ဖြစ်နေတဲ့ အတွက် အစ္စရေး အစိုးရက လိုလိုလားလား မရှိခဲ့တာကြောင့် မအောင်မြင်ခဲ့ပါဖူး၊

 

နောက်ပိုင်းတော့ ဆူလေမာနီး က မှောင်ရိပ်ထဲက ထွက်လာပြီး အမေရိကန်တွေကို တိုက်ခိုက်မှုတွေမှာ ဗြောင်ကျကျ စီမံ ညွန်ကြားလာခဲ့ပါတယ်၊ တဖန် တာလီဘန် နဲ့ အိုင်အက်စ်တွေကို ချေမှုန်းရာမှာ မြေပြင်ရှိ အီရန်တပ်များကို လေကြောင်း အကာအကွယ်ပေးနိုင်ဖို့ အမေရိကန်ရဲ့ အကူအညီကို ရယူခဲ့ပြန်ပါတယ်။

 

အောက်တိုဘာလ ထဲမှာ မော့ဆက်က သူ့ကို လုပ်ကြံဖို့ ကြိုးပမ်းမှု ပျက်ပြားသွားခဲ့ပါတယ်၊ ဖခင်အတွက် ရည်စူးပြီး ဆောက်လုပ်ထားတဲ့ ဘုရားကျောင်းရှိ ဘာသာရေး အခမ်းအနား ကို တက်ရောက်လာမယ့် ဆူလေမာနီးကို ဘုရားကျောင်းအောက်မှာ ဥမှင်လှိုဏ်ခေါင်းတူးပြီး ပေါင် ၁,၁၀၀ အလေးချိန်ရှိ ဗုံးထောင်ထားခဲ့တာ ဖြစ်ပေမယ့် အီရန် ထောက်လှမ်းရေး က လက်ဦးမှု ယူပြီး ဖမ်းဆီးနိုင်လိုက်လို့ ပျက်ပြယ်သွားခဲ့ရတာ ဖြစ်ပါတယ်။

 

သူမသေမီ ၁၈ လ က ထရန့်ကို အခုလို ပြောဆို ကြိမ်းဝါးသွားခဲ့ပါတယ်။

 

“မစ္စတာ ထရန့် ခင်ဗျားက လောင်းကစား သမား တယောက်ပဲဗျ၊ အခု ခင်ဗျားကို ကျွန်တော်ပြောပြီ၊ ခင်ဗျား ဘယ်လိုမှ ထင်မထားတဲ့ နေရာ ကို ကျွန်တော်တို့ ရောက်အောင် လာခဲ့မယ်ဆိုတာပဲ၊ ခင်ဗျားဖက်က စလာမယ့် စစ်ပွဲကို ကျွန်တော်တို့ကပဲ အဆုံးသတ်ပေးရလိမ့်မယ်”

 

(ပုံတွင် အမေရိကန်တို့၏ ဒရုန်း တိုက်ခိုက်မှုကြောင့် မီးလောင်ကျွမ်းနေဆဲ ဖြစ်တဲ့ ဆူလေမာနီး ၏ ကားကို တွေ့ရစဉ်)

 

ကိုးကား၊ ၊ The Economist / Daily Mail (UK) / Bloomberg / Foreign Policy (U.S)/ The Guardian (UK)


Quote of The Day

There comes a time when one must take a position that is neither safe, nor politic, nor popular, but he must take it because conscience tell him it is right.


Martin Luther King Jr

Subscribe