နိုင်ငံ အများစု တွင် တီဗီ ကောင်းကောင်း တလုံးကို ဈေးပေါပေါ နှင့် ဝယ်၍ရနေသည်၊ Netflix လစဉ် ကြေးသည်လည်း ပီဇာတဗန်းစာ ဖိုးပင်မရှိ၊ သို့သော် မြောက်ကိုရီယား တွင်တော့ တီဗီ ဇာတ်လမ်း ကောင်း ကောင်း တခု ကို ကြည့်မည်ဆိုက အသက် ဆုံးရှုံးသည်အထိ ဖြစ်သွားနိုင်သည်။

၂၀၂၀ တွင် ထုတ်ပြန်ခဲ့သော "ဖေါက်ပြန်သည့် အတွေး အခေါ်များ တိုက်ဖျက်ရေး" ဥပဒေ ဖြင့်မြောက်ကိုရီယား နိုင်ငံသား များအား ရန်လိုသော အင်အားစု များ ၏ ပုတ်သိုးနေသော ဝါဒ သဘောတရားများ၊ ယဉ်ကျေးမှု များကို သုံးစွဲခြင်း၊ ပိုင်ဆိုင်ခြင်း၊ ဖြန့်ချီခြင်း များ မပြုလုပ်ရ ဟု တား မြစ်လာသည်။ ဆိုလိုသည်က တောင်ကိုရီယား မှ ထုတ်သော ကေ ဒရာမာ၊ ကေ ပေါ့ များ၊ စာအုပ်များ၊ အရုပ်ကားချပ်များ၊ ဓါတ်ပုံများကို လက်ဝယ် ထားရှိ အသုံးပြုပါက အလုပ်ကြမ်း စခန်း သို့မဟုတ် သေဒဏ် အထိ အပြစ်ပေး နိုင်သည် ဟူ၍ ဖြစ်သည်။

လူ့အခွင့် အရေး အဖွဲ့များက ထိုဥပဒေ ဖြင့် ကွပ်မျက်ခံရသူ အများအပြား ရှိလာသည်ဟု သတင်းထုတ်ပြန်ခဲ့သည်။ ၂၀၂၂ အတွင်း အသက် ၂၂ အရွယ်ရှိလယ်သမား တဦးသည် တောင်ကိုရီယား သီချင်း အပုဒ် ပေါင်း ၇၀ ခန့်ကို နားထောင်ခဲ့မှု၊ တောင်ကိုရီယား ရုပ်ရှင် သုံးကား ကို ကြည့်ရှူခဲ့မှု၊ မိတ်‌ဆွေများအား ဝေငှ ခဲ့မှု တို့ဖြင့် ကွပ်မျက်ခံခဲ့ရသည်။

ထိုသို့ အန္တရာယ်များ ရှိနေသော်ငြားလည်း မြောက်ကိုရီယား တို့သည် ကေ ဒရာမာ များကို အားရပါးရ ကြည့်နေကြသည်။ ၂၀၁၆-၂၀ အတွင်း ထွက်ပြေးခိုလှုံ လာသူများအား တောင်ကိုရီယား၏ ပြန်လည် ပေါင်းစည်းရေး ဝန်ကြီးဌာန မှ ကောက်ယူခဲ့သော စစ်တမ်းများ အရ ၈၅ ရာနှုန်းသည် ထိုကဲ့သို့သော တီဗီ ဒရာမာများကို ကြည့်ဖူးခဲ့သူများ ဖြစ်ကြောင်း သိလာရသည်။ သို့သော် ပြည်တွင်းနေ သူများ ကြားတွင်တော့ ထိုမျှလောက် ရာခိုင်နှုန်း များပြားမည် မဟုတ်။ 

မည်သို့သော တီဗီ ဇာတ်လမ်းမျိုးသည် အသက် ဆုံးရှုံးစေသည်အထိ အန္တရာယ် ရှိနေသနည်း။ ထို မေးခွန်း ကို မဖြေမီ မြောက်ကိုရီယား နိုင်ငံသားများသည် အမြဲလို လက်ရာ မမြောက်သည့် ပညာပေး ဇာတ်လမ်းမျိုးကိုသာ ကြည့်ကြရသည်ကို သိထားဖို့ လိုပေသည်။

၂၀၁၁ တွင် ထွက်ရှိသော မြောက်ကိုရီယား ရုပ်ရှင် "A Flower in the Snow" တွင် မင်းသမီး သည် ဘူတာရုံတွင် သူမ နှင့် လက်ထပ်ရန် ရည်ရွယ်ထားသူ၏ ရှုးဖိနပ်ကို တိုက်ပေးနေသည်။ မင်းသမီးသည်စောင် စက်ရုံ ဟောင်းကြီး ကို ပြန်၍ လည်ပတ် နိုင်ရန် နှင့် မိဘမဲ့ က‌ လေး များ ကျွေးမွေး စောင့် ရှောက်ရေး အတွက် သူမ လုပ်ရန် ရည်ရွယ်ထားသည်များ ဇောက်ချ လုပ်နိုင်ရန် ထိုလူ နှင့် လမ်းခွဲဖို့ လိုအပ်လာ၍ နောက်ဆုံး နှုတ်ဆက်သည့် အနေနှင့် လုပ်ပေးလိုက်ခြင်းလည်း ဖြစ်သည်။ နောက်ဆုံးတွင် သူမ၏ စက်ရုံသည် အောင်မြင်သွားပြီး သူမ လမ်းခွဲခဲ့သူသည် စက်ရုံ အတွက် ပစ္စည်းများ လာပို့ရင်း လမ်းတွင် ကြမ္မာဆိုး နှင့် ကြုံခဲ့ရပြီး သေဆုံးသွားခဲ့သည်။

တောင်ကိုရီယား ဒရာမာ များသည် အချစ်ကို အစိုးရ၏ ခြယ်လှယ် ဝါဒ ဖြန့်မှု ကင်းရှင်းပြီး လူပုဂ္ဂိုလ်ချင်းဆိုင်ရာ ဆက်ဆံရေး၊ ပုဂ္ဂလိကဆန္ဒနဲ့ လွတ်လပ်မှုတွေကို ပိုမိုအလေးထားပြီး တင်ဆက်ကြသည်။ ပြုံယမ်းမှ ထွက်ပြေးလာသူ ရေကူး ချန်ပီယံ ရူး ဟီး ဂျင် က တောင်ကိုရီယား တွင် I love you ကို လွတ်လွတ်လပ်လပ် ပြောနိုင်သော်လည်း မြောက်ကိုရီယား တွင်မူ ဥက္ကဌ ကြီး ကင် ဂျောင် အန် နဲ့ သူ၏ ဖခင်ကို ချစ်ပါသည် ဟုသာ ပြောနိုင်ခွင့် ရှိသည်ဟု ဆိုသည်။

မြောက်ကိုရီယား တွင် လူကြိုက်များသော ကေ ဒရာမာသည် ၂၀၁၂ တွင် ထွက်ရှိခဲ့သော "May Queen" ဖြစ်ပြီး ကင် ဂျူ ရီး ဆိုသည့် အမျိုးသမီးသည် ခိုးသွင်းလာသော SD ကပ် ဖြင့် ည လူခြေတိတ်ချိန် သန်းကောင်ယံ တွင် ခိုး ကြည့်ခဲ့ရသည်။ ကြိုက်လွန်း၍ အကြိမ် နှစ်ဆယ်ခန့် ပြန်ကြည့်ဖြစ်ခဲ့သည်ဟု ပြောပြခဲ့သည်။

ဇာတ်လမ်း တွဲ ပေါင်း လေးဆယ် ရှိပြီး ဇွဲကောင်းပြီး အခက်အခဲများကို ကြံ့ကြံ့ခံ ရင်ဆိုင်ရဲသည့် အမျိုးသမီး ဇာတ်ကောင် ဖြစ်သူ ချွန် ဟေး ဂျုးသည် ဆင်းရဲနွမ်းပါးမှု နှင့် မိသားစု အရှုပ်အထွေးများကို ကျော်လွှား လွန်မြောက်လာပြီး သင်္ဘော ဒီဇိုင်း ဆွဲသူ ဖြစ်လာခဲ့သည်။

နောက်ဆုံးတွင် သူမ ဘဝ အတွက် အချစ်ကို ရှာဖွေ ‌တွေ့ရှိခဲ့သည်။ ညံ့ဖျင်း စုတ်ပြတ်နေသည့် အစိုးရ ပိုင် စောင် စက်ရုံ တွင် လုပ်ဖို့ ချစ်သူ ကို စွန့်ပစ်ခဲ့စရာ မလို၊ မိသားစု ပိုင် လုပ်ငန်း၏ အကြီးအကဲ အဖြစ် လူမှန် နေရာ မှန် ရယူပြီး သူမ ၏ အမှောင်လွှမ်းသော အတိတ်ကို ချန်ထားပစ်နိုင်ခဲ့သည်။

"ဒါတွေကို ကြည့်ပြီး ကျမ အတွက် ခွန်အားတွေ ဖြစ်လာခဲ့ရတယ်" ဟု မစ္စက် ကင် က ပြောပြခဲ့သည်။

မြောက်ကိုရီယား များ အဖို့က မီဒီယာသည် ‌ဖျော်ဖြေရေး သက်သက် မဟုတ်တော့၊ သတင်း အချက်အလက်များ ရရာ ရကြောင်း ဖြစ်လာခဲ့သည်။ အနှစ်သာရ အားဖြင့် မယ်မယ်ရရ မရှိလှသည့် ဇာတ်လမ်းမျိုးသည်ပင် ပြင်ပနှင့်အဆက်အသွယ် ဖြတ် ခံထားရသည့် မြောက်ကိုရီယား များ အတွက် ပြတင်းပေါက်များ ဖြစ်လာခဲ့ရသည်။

မြောက်ကိုရီယား ဝါဒ ဖြန့်ချီရေး ယန္တရားကြီးသည် တခါက တောင်ကိုရီယား အား ငရဲတမျှ ဆင်းရဲ နွမ်းပါးနေပြီး ရာဇဝတ်မှုများ ထူပြောလှသည့် နိုင်ငံ အဖြစ် ပုံဖေါ် ပြောဆိုခဲ့ကြဖူးသည်။

တောင်ကိုရီယား ဒရာမများဖက်က လမ်းများ ပေါ်တွင် ပြည့်ကျပ်နေသည့် ကားများ၊ အသားဟင်း အလျှံပယ် နှင့် ဟင်းလျာများ၊ ဇိမ်ခံ ကွန်ဒိုများ ဖြင့် ပြန်၍ ချေ‌ပနိုင်ခဲ့သည်။

မစ္စက် ကင် က ဘာမဟုတ်သည့် အကြောင်းအရာ လေး တခု ကြည့်ရယုံဖြင့် တောင်ကိုရီယား တွင် မည်မျှအထိ လွတ်လွတ်လပ်လပ် နေခွင့် ရနေသည်ကို ခန့်မှန်း နိုင်သည်ဟု ဆိုသည်။ ကိုရီယား ဒရာမာများထဲတွင် ဆံပင်ပုံစံ အမျိုးမျိုး ကို တွေခဲ့ရခြင်း ကို ဆိုလိုခြင်း ဖြစ်သည်။

အာရှ တခွင် လူကြိုက်များသွားခဲ့သည့်၂၀၀၉ ခုနှစ် ထွက်ရှိသည့် "Boys Over Flowers" ရုပ်ရှင်တွင် မင်းသား၏ ဆံပင်အား နာနတ်သီး ပုံစံ ညှပ်ထားသည်ကို တွေ့ခဲ့ရသည်။

တောင် နှင့် မြောက် နှစ်ခုစလုံး အရူးအမူး စွဲလန်းခဲ့ကြသည့် "Crash Landing On You" သည် သမာရိုးကျ မှ ခွဲထွက်လာသော အချစ်ဇာတ်လမ်းမျိုး ဖြစ်သညိ။ တောင်ကိုရီယား လုပ်ငန်းရှင် သူဌေး ကြီး၏ သမီးသည် ပါရာဂလိုက်ဒါ စီးနေရင်း လေပြင်းမုန်တိုင်း မိ၍ မြောက်ဖက်သို့ လွင့်ပါ ဆင်းသက်ခဲ့ရာမှ ဇာတ်လမ်း စတင်လာခဲ့သည်။ ရုပ်ချောချော မြောက်ပိုင်း မှ စစ်သား တဦးက တွေ့ရှိသွားပြီး အိမ်ပြန် ရောက်အောင် ကူညီမည်ဟု ကတိပေးခဲ့ရာ မှ တဖြေး ဖြေး ချစ်မိသွားခဲ့သည်။

ထိုရုပ်ရှင်သည် မြောက် နှင့် တောင်၏ လူနေမှု ဘဝ များကို အတော်လေး တိကျစွာ ဖေါ်ကျုး နိုင်ခဲ့၍ ၃၈ မျဉ်းပြိုင် ဟိုဖက်ခြမ်း ရော ဒီဖက်ခြမ်းပါ အတွေးသစ် အမြင်သစ် များ ရရှိလာစေခဲ့သည်။

မြောက်ကိုရီယား များ အတွက် တောင်ကိုရီယား ဇာတ်လမ်းများသည် ရင်းနှီးကျွမ်းဝင်ပြီး ဖြစ်ယုံမက အထူး အဆန်းများ ပါဝင်နေသည်၊ သရုပ်ဆောင်များသည်လည်း ကိုရီယား လူမျိူး များ ဖြစ်၍ ဘာသာ စကားလည်း အတူတူပင်၊ ငွေကုန်ကြေးကျ ခံပြီး ရိုက်ကွင်း ရိုက်ကွက်များ ကို အထူး ပြုလုပ်ချက် များ နှင့် တခမ်းတနား ရိုက်ကူးခဲ့ကြ၍လည်း မြောက်ကိုရီယား ရုပ်ရှင်များ နှင့် ကွာခြားချင်တိုင်း ကွာခြားနေသည်။

မြောက်ကိုရီယား ဖက်ရှိ စီးပွား‌ ရေး အမြင်ရှိသော ဆံသဆရာ များလည်း တောင်ကိုရီယား တို့၏ ဆံပင် ပုံစံများကို အတုခိုး ညှပ်တပ်အောင် ကြိုးစားခဲ့ကြပြီး လူငယ်များကလည်း စကားပြောပုံ ဆိုပုံက အစ အတုယူလာကြသည်။

အရင်းရှင် တို့၏ ညစ်ညမ်းသော အမှောင့် ပယောဂ များကို တိုက်ဖျက်ရန်ဟု ဆိုကာ ၂၀၂၃ တွင် "ပြုံယမ်း ယဉ်ကျေးမှု၊ ဘာသာ စကား ကာကွယ်ရေး" ဥပဒေ ကို ပြဋ္ဌာန်းလာခဲ့ပြန်သည်။ ထိုဥပဒေထဲတွင် တောင်ကိုရီယား တွင် ပြောနေ ခေါ်နေကျ ဖြစ်သည့် အိုပါး (အကိုကြီး) ဆိုသည် ကို ပြောဆို သုံးနှုန်းခြင်း မပြုရ ဟု ပါရှိလာသည်။

မြောက်ကိုရီယား တို့က ၎င်းတို့ အကြိုက်ဆုံး ဇာတ်လမ်း များ ကြည့်နိုင်ရန် မရမက ကြိုးစားခဲ့ကြသည်။ နယ်စပ်နှင့် နီးသူများက ၎င်းတို့ တီဗီ များထဲ ကြည့်၍ မရအောင် ထည့်သွင်းထားသည့် ဟန့်တားထားမှုများကို ဖယ်ရှားပြီး တရုတ် နှင့် တောင်ကိုရီယား လိုင်းများကို ဖမ်းယူ ကြည့်ရှုခဲ့ကြသည်။ (မစ္စက် ကင် လည်း ထိုကဲ့သို့ ကြည့်ရှုခဲ့ခြင်း ဖြစ်သည်)

အချို့က တရုတ်ပြည်မှ မင်မိုရီ စတစ်များ၊ SD ကပ် များ ဖြင့် ခိုးသွင်းလာခဲ့သည်။ အချို့က မိတ်ဆွေများ ထံမှ မင်မိုရီ ကပ်များ ငှားရမ်းခဲ့ကြသည်။ ပိုက်ဆံရှိပြီး ကံကောင်းသူ အနည်းငယ်သာ မှောင်ခို ဈေးမှ ဝယ်နိုင်ကြသည်။

တောင်ကိုရီယား ၏ ကေ ဒရာမာ များသည် နိုင်ငံရေး နှင့် ပတ်သက်ခဲလှသော်လည်း မြောက်ပိုင်းရှိ အာဏာ ပိုင်များကမူ ၎င်းတို့အား တိုး၍ ခြိမ်းခြောက် လာနေပြီဟု မှတ်ယူ လာကြ၍ ပြင်းပြင်းထန်ထန် ဒဏ်ခတ်လာကြခြင်းလည်း ဖြစ်သည်။ ယခင်က ဖြန့်ချီသူ ကိုသာ သေဒဏ် ပေးလေ့ ရှိသော်လည်း ယခုအခါ လက်ဝယ်ရှိယုံ ဖြင့် သေဒဏ် ကျခံရဖို့ ဖြစ်လာခဲ့သည်။

တောင်ကိုရီယား ၏ အနှစ်သာရမဲ့ ကေ ဒရာမာ များသည် ၎င်းတို့၏ ပျော်ရွှင်စရာ ခမ်းခြောက်နေသော အစိုးရ အပေါ် နိုင်ငံသားများ၏ သစ္စာ ရှိနေမှု ကို ဖျက် လို ဖျက်စီး လုပ်နေပြီဟု မြောက်ကိုရီယား ထီးနန်းကို မျိုးရိုးစဉ်ဆက် ဆက်ခံ လာသူ ကင်‌‌ ဂျောင် အန်းကယူဆ လာသည်။

မြောက်ကိုရီယား တို့ ယခုလို နတ်ဘုံနတ်နန်း တမျှ ချမ်းချမ်းသာသာ နေထိုင်ကြရခြင်းသည် ကင် မိသားစုအဆက်ဆက် ဘုရားသခင်ကဲ့သို့ စောင့်ရှောက် ပေးလာ၍ ဖြစ်သည်ဟု အမြဲလို ရိုက်သွင်း ‌ပေးနေ ခဲ့သည်။

တောင်ကိုရီယား တွင် ၎င်းတို့ထက် ပိုမို ကောင်းမွန် အောင် ‌နေထိုင်နိုင်ကြသည်ဟု တွေ့နေရခြင်းကြောင့် အာဏာပိုင်တို့၏ အပြောသည် မဟုတ်မှန်း သိလာခဲ့ကြသည်၊ ထို့အတွက် ကြောင့်လည်း နိုင်ငံ ပတ်ပတ်လည် သံဆူးကြိုးများ ကာရံ ပိတ်လှောင်ထားကြပြီး ထွက်ပြေးသွားကြသူများ၏ ဆွေမျိုး သားချင်း များ အားလည်း အလုပ်ကြမ်း စခန်းများသို့ ပို့ ပစ် ခဲ့ကြခြင်းပင် ဖြစ်သည်။

(၂၀၂၅ ဇူလိုင် ၃ ရက် နေ့ထုတ် အီကောနော်မစ် မဂ္ဂဇင်း တွင် ပါရှိသည့် "The TV shows people risk death to watch" ကို ပြန်လည် တင်ပြသည်)