20. BE AS COURAGEOUS AS YOU CAN.

ကျွနုပ်တို့ တဦးတလေမျှ လွတ်လပ်စွာ နေထိုင်နိုင်ခွင့် အတွက် အသက် စွန့်လွှတ်ရန် ပြင်ဆင်ထားခြင်း မရှိလျင် ကျွနုပ်တို့ အားလုံး အာဏာရှင် လက်အောက်တွင် သေဆုံးကြရဖို့သာ ရှိသည်။

အာဏာရှင် စနစ်မှ ထုတ်နှုတ်ယူရမည့် သင်ခန်းစာ နှစ်ဆယ် တွင် နောက်ဆုံး အချက်ကိုတော့ စာရေးသူက ကြောက်စရာ ကောင်းလောက်အောင် ခပ်တိုတို ပင် ရေးသားသွားခဲ့သည်။

ရှိတ်စပီယား၏ Hamlet ပြဇာတ် တွင် အဓိက ဇတ်ကောင် Hamlet သည် ကိုယ်ကျင်သီလ နှင့် ပြည့်စုံသူ တဦး ဖြစ်သည်။ ထိုသို့သော ပုဂ္ဂိုလ် သည် ကောက်ကျစ်စင်းလဲပြီး မင်းကျင့်တရား နှင့် ပြည့်စုံခြင်း ကင်းမဲ့လှသည့် အုပ်ချုပ်သူ မင်းတပါး ရုတ်ခြည်း ဆိုသလို ပေါ်ထွက်လာခြင်းကို တုန်လှုပ်သွားမည်မှာလည်း သဘာဝ ကျသည်၊ ဖြစ်လည်း ဖြစ်သင့်သည်။

ထို့အတွက် သူသည် အထီးကျန်ခြင်း၊ အိမ်မက်ဆိုးများ၏ ခြောက်လှန့်ခံရခြင်း တို့ ခံစားလာရသည်။

အဘယ်ကြောင့်နည်း၊

Hamlet သည် ဖခင် ဖြစ်သူ ဘုရင် အဆိပ်သင့်ကာရုတ်တရက် သေဆုံးပြီး သိပ်မကြာခင်မှာပင် ဦးလေးဖြစ်သူ Claudius က နန်းတက်ပြီး မိခင်နှင့်ပါ အလျင်စလို လက်ထပ်လိုက်တာကို မြင်တွေ့လိုက်ရ၍ ဖြစ်သည်။

Hamlet သည် "The time is out of joint" မြည်တမ်းခဲ့သည်။ ထိုစကားစု သည် လူ့ခန္ဓာကိုယ်က အရိုးအဆစ်လွဲတာ (dislocated) ကို ဆိုလိုတာဖြစ်ပြီး၊ ပြဇာတ်ထဲမှာတော့ ကမ္ဘာလောကကြီး အစီတစဉ်တကျ ရှိနေမှု ပျက်စီးသွားပြီလောဟု တင်စားလိုက်ခြင်း ဖြစ်သည်။

Hamlet က O cursed spite/ That ever I was born to set it right ပြောပြန်သည်။

ဆိုလိုသည်မှာ သူ့တွင် ဝမ်းနည်းမှု၊ ကျိန်စာသင့် ခံရသလို ဖြစ်သည့် ကံကြမ္မာ ကို မကျေနပ်သော်လည်း ဒီအရေး ကို ပြန်လည် ပြင်ဆင်ဖို့ မွေးဖွားလာရပြီဟု ဖခင် အတွက် လက်စားချေရမည့် တာဝန်ကြီးနှင့် ယခုလို ဖြစ်လာသည့် အချိန်ကာလ မျိုးကို ပြန်လည် ပြင်ဆင်ရမည့် အရေး သူ့ ပုခုံး ပေါ် ကျလာရသည်ကို မကျေမနပ် စိတ်နှင့် ပြောလိုက်ခြင်း ဖြစ်သည်။

သို့သော် ကျွန်တော်တို့ ရင်ဆိုင်နေရသော ကာလကြီးသည်လည်း တသက်နှင့် တကိုယ် မကြုံဖူးသည့် အဖြစ်ဆိုးများနှင့် ရင်ဆိုင်နေကြရပြီ ဖြစ်သည်။ 

မိမိတို့ ကြုံခဲ့သည့် ငါးနှစ်ကာလ အတွင်း ပုံမှန် အတိုင်း အပူ အပင် ကင်းစွာ ပျော်ရွှင်ခဲ့ရမှုများ၊ လွတ်လပ်စွာ စီးပွား ရှာနိုင်ခဲ့မှုများ၊ မိမိတို့ စိတ်ထဲ ရှိသမျှ ထုတ်ဖေါ် ပြောဆိုခွင့် များ အစရှိသည် အချိန်များ ပြန်လည် ပိုင်ဆိုင်ခွင့် ရဖို့ ခိုင်မာ‌ သော ဆုံးဖြတ်ချက် ဖြင့် တည်ဆောက်ရတော့မည့် လွန်စွာ အရေးကြီးသော အချိန်ကို ရောက်နေပြီ ဖြစ်သည်။

ထိုသို့ မဟုတ်ပါက ဆရာ ဗန်းမော်တင်အောင်က သူ၏ "ကျွန်တော်" ဆိုသော စာအုပ်တွင် ရေးသားခဲ့သလို အဖြစ်မျိုး နှင့် ကြုံကြရတော့မည် ဖြစ်သည်။

"ခင်ဗျား တို့ ကျွန်တော်တို့ လူမျိုးတွေရဲ့ ကနေ့ ဆိုက်ရောက်နေတဲ့ အဖြစ်ဟာ စေ့စေ့ကြည့်ရင် အင်မတန် ရင်နာစရာ ကောင်းတယ်၊ လူတွေဟာ နှစ်ပေါင်း (၂၀) နီးပါးလောက် အတွင်း သေရ၊ ကြေရ၊ နာရ၊ ကျင်ရ၊ ငတ်ရ၊ ပြတ်ရ၊ ဆင်းရဲ မွဲရ၊ ပူရ၊ ပင်ရ၊ ငိုရ၊ ညည်းရ ဖန်များအား ကြီးလာတော့၊ ဘာဖြစ်လာကြသလဲ ဆိုရင် ထိုင်း လာ ကြတယ် မိတ်ဆွေ၊ ဒါဟာ အင်မတန် ကြောက်စရာ ကောင်းတဲ့ လက္ခဏာပဲ။

ဒီ အထုံအထိုင်း ရောဂါကြီး စွဲလာလိုက်တာ နောက်ဆုံး ဘယ်အခြေ အထိ ဆိုးလာသလဲ ဆိုရင် လူတွေဟာ မရယ်တတ်၊ မပြုံးတတ်တဲ့ အဆင့်ကို ရောက်လာကြပြီ မိတ်ဆွေ၊ အင်မတန် ရယ်စရာ ကောင်းတဲ့ အကွက်တကွက် ကို တွေ့နေရ‌တာတောင်မှ လူတွေဟာ ရယ်ဖို့မေ့နေကြတယ်၊ သတိရလာလို့ ရယ်လိုက်ကြပြန်တဲ့ အခါမှာလဲ မဲ့မဲ့ ရွှဲ့ရွှဲ့ နဲ့ မလှမပ ရယ်လိုက်ကြတယ်၊ အူလှိုက်သဲလှိုက် မရယ်တတ်ကြတော့ဘူး၊ ဟက်ဟက်ပက်ပက် ရယ်လို့ မရကြတော့ဘူး၊ ဒီအဖြစ်ဟာ ဘယ်လောက်များ အသည်းနာစရာ ကောင်းသလဲ မိတ်ဆွေ။

ရှိသမျှ သတ္တဝါ တွေမှာ လူသတ္တဝါ တမျိုးပဲ ရယ်တတ်တယ် မိတ်ဆွေ၊ ဒါကြောင့် အချို့ အဘိဓမ္မာ ပညာရှင်ကြီးတွေက လူသည် ရယ်မောတတ်တဲ့ သတ္တဝါလို့ ကိုးကား ရည်ညွှန်းလေ့ ရှိကြတယ်၊ ဒါဟာလဲ အမှန်ပဲ၊ ရယ်တာဟာ အင်မတန် အရေးကြီးတယ်၊ လူ နဲ့ အခြား တိရစ္ဆာန်တွေရဲ့ခြားနားချက်ကြီး တခုဟာ ရယ်တဲ့ ကိစ္စပဲ၊ တိရစ္ဆာန်တွေဟာ မရယ်တတ်ရှာကြဘူး၊ လူတမျိုးပဲ ရယ်တတ်တယ် မဟုတ်လား၊ ဒါပေမယ့် ကျွန်တော်တို့ အမျိုးသား တွေ ဟာ နှစ်ပေါင်း (၂၀) နီးပါးလောက် မျက်ရည် နဲ့ မျက်ခွက် နေလာခဲ့ကြရတော့ မရယ်တတ်ကြတော့ဘူးဗျ၊ ဒါကြောင့် လူတွေစစ်စစ်က တိရစ္ဆာန် အဆင့်ကို လျှောကျမှန်း မသိ လျှောကျ‌နေကြပြီ။"

************

ကျွန်တော် ဆက်လက် တင်ပြဖို့ ရွေးချယ်ထားသည့် အကြောင်းအရာကတော့ Bill O'Reilly ရေးသားပြီး ချက်ခြင်းလို ဘက်စ်ဆဲလား စာရင်းတွင် ထိပ်ဆုံးက ရောက်ရှိသွားသည့် Killing the SS စာအုပ်ပင် ဖြစ်သည်။ 

ဒုတိယ ကမ္ဘာစစ်ကြီး ပြီးလျင် ပြီးချင်း ယမ်းငွေ့များ မစဲသေးခင်မှာပင် တတိယ ရိုက်ခ်ျ နိုင်ငံတော်ကြီး ၏ ထိတ်လန့် ခြောက်ခြား ဖွယ် ဖြစ်ရပ်များက တဖြေးဖြေး ဗူးပေါ်သလို ပေါ်လာခဲ့ပြီ ဖြစ်သည်။

နာဇီ စစ်ရာဇဝတ်ကောင်များသည်လည်း ‌ခြေဦးတည့်ရာ ထွက်ပြေး တိမ်းရှောင်ကုန်ကြသည်။ SS ခေါင်းဆောင် ဟိုင်းရိခ်ျ ဟင်းမလား အပါအဝင်အချို့ကို ချက်ခြင်းလို ဖမ်းဆီးမိပြီး အချို့ကလည်း လိုအပ်လျင် ခေါင်းဆောင်များအား ကယ်ထုတ်သွားရန် လျို့ဝှက် ဖွဲ့စည်းထားသည့် နာဇီ အဖွဲ့အစည်းမှ နိုင်ငံ ပြင်ပ ရောက်အောင် ကူညီ ပို့ဆောင်ပေးခဲ့ကြသည်။

ထိုသို့ လွတ်မြောက်သွားသူများတွင် အောက်ရှ်ဝစ် အကျဉ်းစခန်း တွင် လွန်စွာ ရွံရှာဖွယ် ကောင်းသည့် စမ်းသပ်မှု များ ပြုလုပ်ခဲ့၍ "သေမင်းတမန် နတ်သား" ဟု အမည်တွင်ခဲ့သည့် ဒေါက်တာ ဂျိုးဇက် မန်ဂယ်လိ၊ ဟစ်တလာ၏ ကိုယ်ရေး အရာရှိ မာတင် ဘောမင်း၊ လိုင်ယွန် သားသတ်သမား butcher of Lyon အဖြစ် နာမည်ဆိုး နှင့် ကျော်ကြားခဲ့သည့် ကလော့စ် ဘာဘီ၊ ထိုအထဲတွင် အဆိုးတကာ့ အဆိုးဆုံး ဖြစ်သည့် အဒေါ့ဖ် အိုက်ခမန်း တို့ ဖြစ်သည်။

၎င်းတို့အား အမဲလိုက်သလို လိုက်ပြီး တရားဥပဒေ ရှေ့မှောက်သို့ အရောက် ပို့ နိုင်ရန် ကျားကုတ်ကျားခဲ ကြိုးစားခဲ့ကြသည့် ပြင်သစ် လင်မယား၊ အမေရိကန် ရှေ့နေ၊ နာဇီ ပါတီ အပေါ် သစ္စာခံခဲ့ဖူးသည့် ဂျာမန် ရှေ့နေကြီး၊ မော့ဆက်အေးဂျင့်တို့၏ ဖြစ်ရပ်မှန် ဇာတ်လမ်းများ အား သွက်လက်စွာ ရေးသားထားသော စာအုပ် ဖြစ်သည်။

ဤကမ္ဘာမြေပေါ်တွင် ထိုမျှလောက် ဆိုးသွမ်း ယုတ်မာလှသည့် စနစ်ကြီး ပေါ်ထွန်းခဲ့ဖူးသည်ကို အမှတ်ရပြီး သင်ခန်းစာ ယူနိုင်ရန် နှင့် သမိုင်း ဖြစ်ရပ်မှန်များ သိရှိ နိုင်စေရန် ဖြစ်သည်။