ထရမ့် အစိုးရ၏ မြန်မာ နိုင်ငံသား ၄,၀၀၀ ခန့်အား ယာယီ စောင့်ရှောက်ခံ အဆင့် ရုပ်သိမ်းလိုက်ပြီး နောက်တရက်တွင် အမေရိကန် အထက် နှင့် အောက်လွှတ်တော် ရှိ ဒီမိုကရက် နှင့် ရီပတ်ဘလီကင် အမတ်များက လာမည့်လ အတွင်း ပြုလုပ်မည့် စစ်အုပ်စု၏ ရွေးကောက်ပွဲ သည် တရားမျှတပြီး လွတ်လပ်မှု ရှိမည် မဟုတ်၍ ထွက်ပေါ်လာသော ရလဒ်ကို အသိအမှတ် မပြုရန် ထရမ့် အစိုးရအား တောင်းဆိုလိုက်ကြသည်။
ယင်း ရွေးကောက်ပွဲသည် တရုတ်ထောက်ခံမှု ပေးထားသည့် စစ်အုပ်စု အား တရားဝင်မှု ရှိလာစေရန် ရည်ရွယ် လုပ်ဆောင်ခြင်း သက်သက် ဖြစ်သည်ဟု လည်း ၎င်းတို့၏ ကြေညာချက်တွင် ပါရှိသည်။
ယခုအခါ မြန်မာ ပြည်သူများသည် ၎င်းတို့ တနိုင်ငံလုံး ကို အုပ်စီး မသွားနိုင်အောင် အဖမ်းခံ၊ အသေခံ၊ အနှိပ်စက်ခံ ၍ ရဲရဲဝန့်ဝန့် ခုခံ ဆန့်ကျင် တွန်းလှန်နေကြသည်ဟု ဆိုသည်။
ဒီမိုကရေစီနှင့် နိုင်ငံတကာ အသိအမှတ်ပြု လူ့အခွင့်အရေးများအပေါ် အမေရိကန်၏ ကတိကဝတ်နှင့်အညီ၊ မြန်မာပြည်သူများအနေဖြင့် ၎င်းတို့ နှစ်သက်သည့် အစိုးရကို လွတ်လပ်ပြီး တရားမျှတစွာ ရွေးချယ်ခွင့်ကို ငြင်းပယ်ထားသည့် ချွတ်ယွင်းနေသော ရွေးကောက်ပွဲများနှင့် ထွက်ပေါ်လာသော မည်သို့ သော ရလဒ်မျိုး ကိုမဆို ဆန့်ကျင်ပြောဆိုရန်အတွက် ကျွန်ုပ်တို့သည် ထရမ့်အစိုးရနှင့် —အမေရိကန်၏ ဒီမိုကရေစီ မဟာမိတ်များအားလုံးကို— တိုက်တွန်းပါသည်ဟုလည်း ပါရှိသည်။
တနင်္လာနေ့က ပြည်တွင်း လုံခြုံရေး ဝန်ကြီး ခရစ်စတီ နိုးမ် မှ မြန်မာ နိုင်ငံ၏ အခြေအနေများ လုံလောက်သည့် အတိုင်းအတာ အထိ တိုးတက်မှု ရရှိလာပြီ ဖြစ်၍ မြန်မာနိုင်ငံသားများ လုံခြုံစိတ်ချစွာ အိမ်ပြန်၍ ရပြီ ဆိုကာ ယာယီ စောင့်ရှောက်ထားသည့် အဆင့်အတန်း ပေးထားမှု ကို ရုပ်သိမ်း ကြောင်း ကြေညာချက်ကို ထုတ်ပြန်လာသည်။
စစ်အုပ်စုသည် ၎င်းတို့၏ ရွေးကောက်ပွဲ အား အမေရိကန် မှ အသိအမှတ် ပြုလိုက်ခြင်း ဖြစ်သည်ဆိုကာ အဆိုပါ သဘောထား ပို၍ ခိုင်မာလာစေရန် မျက်နှာလို မျက်နှာရ လုပ်သည့် အနေဖြင့် သံပုံးတီးသူများ၊ လက်သုံးချောင်း ထောင်သူများ၊ ပန်း ပန်သူများ အစရှိသဖြင့် မတရား ဖမ်းဆီးခံထားရသူ ၃,၀၀၀ ကျော်အား ရွေးကောက်ပွဲတွင် ပါဝင်နိုင်ရန် ဆိုကာ လွှတ်ပေးလာခဲ့သည်။
မျှော်လင့်ထားသည့် အတိုင်း ထရမ့် အစိုးရ ၏ ဆုံးဖြတ်ချက်ကို စစ်အုပ်စု က ကြိုဆိုလိုက်သည်။
အာရှ လူ့အခွင့် အရေး နှင့် အလုပ်သမား ရေးရာ အဖွဲ့ မှ ဒါရိုက်တာ ဖီလ် ရော်ဘတ်ဆန်မှ နိုးမ်မှ ရွေးကောက်ပွဲသည် လွတ်လပ်ပြီး တရားမျှတသည်သည် ဟု ယုံကြည်သည် ဆိုလျင်တော့ အလွန်အကျွံ အလှည့်စား ခံထားရသူသာ ဖြစ်မည်ဟု ပြင်းပြင်းထန်ထန် ဝေဖန်လိုက်သည်။ "သူမ၏ အမိန့်ကို အကောင်အထည်ဖော်မယ်ဆိုရင် သူတို့ကို မြန်မာနိုင်ငံက ထောင်တွေ၊ ရက်ရက်စက်စက် နှိပ်စက် ခံရ မှုတွေနဲ့ သေမင်းထံ တိုက်ရိုက်ပြန်ပို့လိုက်တာ ဖြစ်ပါလိမ့်မယ်။" ဟု လည်း ဆိုသည်။
ကုလ သမဂ္ဂ ဖွဲ့စည်းပေးထားသော မြန်မာအရေး လွတ်လပ်စွာ စုံစမ်းရေး ယန္တရား မှလည်း ရွေးကောက်ပွဲ နီးကပ်လာသည် နှင့် အမျှ စစ်အုပ်စု မှ စစ်ရာဇဝတ်မှု များ ပို၍ပင် ဆိုးဆိုးရွားရွား ကျုးလွန်နေသည့် သတင်း ပေးပို့မှု များ ရရှိထားပြီး ကျုးလွန်သူများကို တရားဥပ ဒေ နှင့် အညီ အရေးယူသွားမည်ဟု ကြေညာချက် ထုတ်ပြန်လာခဲ့ပြန်သည်။
မြန်မာ အရေး စာအုပ်ပေါင်း များစွာ ရေးသားခဲ့သူ အလန် ကလီမင့်က "ထိုလုပ်ရပ်သည် မူဝါဒ ပိုင်း မှားယွင်းတွက်ဆမှု မဟုတ်ဘဲ သြတ္တပ္ပစိတ် ဆိုးဆိုးရွားရွား ပျောက်ပျက် သွားခြင်းသာ ဖြစ်သည်။ ပြည်တွင်းစစ်နှင့် ရင်ဆိုင်နေရသည့် ရွေးကောက်ခံ ခေါင်းဆောင်တွေကို တစ်ဦးတည်း သီးခြားချုပ်နှောင်ထားသည့် အစိုးရလက်အောက် တွင် ရှိနေဆဲဖြစ်ပြီး စစ်ရာဇဝတ်မှုများကို ပုံမှန်ကျူးလွန်နေသည့် စစ်ခေါင်းဆောင်များ၏ ဖျက်ဆီးခံထားရသော နိုင်ငံတစ်ခုအား အမေရိကန်အေဂျင်စီတစ်ခုမှ 'လုံခြုံမှု' ရှိသည်ဟု အသိအမှတ်ပြုလိုက်ခြင်းသည် ကိုယ်ကျင့်တရား နှင့် အမှန်တရားဆိုင်ရာ သမာဓိရှိမှုကို စွန့်လွှတ်လိုက်ခြင်း နှင့် အတူတူ ဖြစ်သည်။" ဟု အေရှား တိုင်းမ် တွင် ဆောင်းပါး ရေးသားပြီး ဝေဖန် ရှုတ်ချလိုက်သည်။
၎င်းက ဆက်လက် ရေးသားရာတွင် မြန်မာနိုင်ငံသည်တည်ငြိမ်ရေးနှင့် 'အမျိုးသားပြန်လည်သင့်မြတ်ရေး' တွင် 'ထူးခြားတဲ့ တိုးတက်မှု' တွေ ရရှိခဲ့ပြီဆိုသည့် အပြောသည် ခွဲခြမ်းစိတ်ဖြာ သုံးသပ်ခြင်းမှ ထွက်ပေါ်လာခြင်း မျိုး မဟုတ်ဘဲ အစွန်းရောက် ဝါဒဖြန့်ချိရေးသက်သက်ပင် ဖြစ်သည်။ ယင်းသည် စစ်အုပ်စု၏ ပြောစကားများကို ပြန်လည်အသုံးပြုပြီး အစိုးရ အကဲဖြတ်မှုအဖြစ် ပုံပြောင်းကာ အမေရိကန်ပြည်ထောင်စု၏ တံဆိပ် ခတ်နှိပ်ပြီး ကမ္ဘာကို တင်ပြနေခြင်း သာ ဖြစ်သည်ဟု ဆိုသည်။
အမေရိကန်သည် ကိုယ်ကျင့်တရားကို စွန့်လွှတ်ပြီး နိုင်ငံရေးအရ အဆင်ပြေလွယ်ကူမှုကို အစားထိုးလိုက်ခြင်း ဖြစ်သည်။ မြန်မာပြည်သူများကို သစ္စာဖောက်ရုံသာမက အမေရိကန်ပြည်ထောင်စုမှ ကာကွယ်စောင့်ရှောက်ပါမည်ဟု ကြွေးကြော်ထားသည့် ဒီမိုကရေစီ၊ လူ့အခွင့်အရေး၊ တရားဥပဒေ စိုးမိုးရေးနဲ့ ဖိစီးနှိပ်စက်မှုကနေ ထွက်ပြေးလာသူတွေကို အကာအကွယ်ပေးသွားမည် အစရှိသည့် မူဝါဒအားလုံးကို လည်း သစ္စာဖောက်လိုက်ခြင်းပင် ဖြစ်သည်။
အထင်အမြင်လွဲမှားစေသော မဟုတ်မမှန်မှုများ၊ ထိခိုက်နစ်နာစေသော မဟုတ်မမှန်မှုများ ရှိသလို ယင်းစကားများကို ထုတ်ဖော်ပြောဆိုလာသော အမေရိကန်ပြည်ထောင်စု ပြည်တွင်းလုံခြုံရေးဌာန၏ ကိုယ်ကျင့်တရား ပြိုလဲကျဆုံးမှုကို ပို၍ ထင်ရှားသွားခဲ့ရသည်။ ၎င်းတို့၏ ပြိုလဲ ကျဆုံးမှု သည် လူအများကို သေစေသည့်အထိ ဖြစ်နိုင်သည်ဟု ရေးသားထားသည်။
ပြည်သူတော်လှန်ရေး တပ်ဖွဲ့များသည် လူထု အား ထိတ်လန့် ကြောက်ရွံစေရန် ရည်ရွယ်ချက် သက်သက် ဖြင့် စစ်ကြောင်းထိုးလာသော အင်အား ၁၂၀ ပါ စစ်အုပ်စု နှင့် ပျူစောထီး ပူးပေါင်း စစ်ကြောင်း အား တနင်္ဂနွေ နေ့က စစ်ကိုင်း တိုင်း ဝက်လက် မြို့နယ် အတွင်း တပ်ပျက်သွားသည် အထိ ချေမှုန်း နိုင်ခဲ့ကြသည်ဟု သတင်းများ တွင် ဖေါ်ပြထားသည်။
ပြည်သူတို့၏ တရားသော စစ် မုချ အောင်ရမည်!!!
(ဝါရှင်တန် ရှိ တရုတ်သံရုံး ရှေ့တွင် စစ်အုပ်စု အား ထောက်ခံနေမှု ကို ကန့်ကွက် ဆန္ဒပြနေသည့် မြန်မာ ပြည်သူ များ အား တွေ့ရစဉ်)
