ဂျိမ်း ဟိသ် သည် SS လူသတ်သမား အား ယခုလို မေးခွန်းထုတ်ပြီး ဖြိုလှဲ ပစ်နိုင်ခဲ့သည်။

အော်လန်ဒေါ့ဖ်: ဂျုးတွေကို တနေရာတည်းမှာ စုပြီး နောက်ပိုင်း ကွပ်မျက်မယ့် နေရာကို ပို့ခဲ့ပါတယ်၊ ထုံးစံ အရတော့ တင့်ကားတွေ ရှေ့ဆက်တက်လို့ မရအောင် တူးထားတဲ့ ကျုံး တို့ မြောင်းတို့ ရှိတဲ့ နေရာ၊ ဒါမှ မဟုတ်လည်း သဘာဝ အတိုင်း ကျဉ်းတွေ ချိုင့် တွေ ရှိတဲ့ နေရာမျိုး တွေ ကို ရွေးခဲ့တယ်။ ကွပ်မျက်ရာမှာလည်း စစ်တပ် ထုံးတမ်းစဉ်လာ အတိုင်း ကွပ်ကဲမှု အောက်မှာ ရှိတဲ့ သေနတ်ပစ် အဖွဲ့ကို စေခိုင်းခဲ့ပါတယ်။"

တရားလို ရှေ့နေ: ကွပ်မျက်မယ့် နေရာရောက်အောင် ဘယ်လို ပို့ခဲ့တာလဲ"

အော်လန်းဒေါ့ဖ် : " ကုန်တင် ထရပ်ကားတွေ နဲ့ ပို့ခဲ့တာပါ၊ ချက်ချင်းလို ကွပ်မျက်နိုင်မည့် အရေအတွက်ကိုသာ တင် ခေါ် ခဲ့တာ ဖြစ်ပါတယ်။ ဒါမှလည်း ကွပ်မျက်ခံရမယ့် လူတွေက သူတို့ ဘာဖြစ်တော့မယ် ဆိုတာကို သိသွားတဲ့ အချိန်နဲ့ အမှန်တကယ် ကွပ်မျက်ခံရသည့် အချိန် ကြားကာလကို ဖြစ်နိုင်သမျှ အတိုတောင်းဆုံးဖြစ်အောင် လုပ်ခဲ့တာပါ"

တရားလို ရှေ့နေ: "ဒါတွေ အားလုံး ခင်ဗျား အိုင်ဒီယာ တွေ ပေါ့"

အော်လန်းဒေါ့ဖ် : "ဟုတ်ပါတယ်"

တရားလို ရှေ့နေ: "ပြီးတော့ အလောင်းတွေကို ဘာလုပ် ပြစ်လဲ"

အော်လန်းဒေါ့ဖ် : "တင့်ကား ဖျက် ကျုံး ထဲ ဖြစ်ဖြစ်၊ ဒါမှမဟုတ်လည်း မြေတူး ပြီး မြုပ်ခဲ့ပါတယ်"

တရားလို ရှေ့နေ: တကယ်တမ်း သေမသေ ဆိုတာကော ဘာကို ကြည့်ပြီး ဆုံးဖြတ်လဲ"

အော်လန်းဒေါ့ဖ် : "အဖွဲ့ ခေါင်းဆောင်ကို ဖြစ်ဖြစ်၊ ကွပ်မျက်တဲ့ သေနတ်ပစ် အဖွဲ့ တပ်မှုး ကို ဖြစ်ဖြစ် အပြီးအပြတ် လုပ်ဖို့ အမိန့်ပေးထားပြီးသားပါ၊ လိုအပ်ရင် သူတို့ကိုယ်တိုင် တာဝန်ယူ ရှင်းပေးရပါတယ်"

တရားလို ရှေ့နေ: "ဘယ်သူတွေက တာဝန်ယူ ရတာလဲ"

အော်လန်းဒေါ့ဖ် : "အုပ်စု ခေါင်းဆောင်ဖြစ်ဖြစ်၊ သူက တာဝန်ပေးထားတဲ့ တယောက် ဖြစ်ဖြစ် လုပ်ပေးရပါတယ်"

တရားလို ရှေ့နေ: အပစ်ခံရမယ့် လူတွေက ဘယ်လို နေပေးရလဲ"

အော်လန်းဒေါ့ဖ် : "ဒူးထောက်၊ ဒါမှ မဟုတ် မတ်တပ်ရပ် ပြီး နေခိုင်းထားပါတယ်"

တရားလို ရှေ့နေ: Einsatz အုပ်စုရဲ့ ရည်ရွယ်ချက်ဟာ ဂျူးလူမျိုးတွေနဲ့ ကွန်မစ်ဆာ (ဆိုဗီယက်ယူနီယံ ကွန်မြူနစ်ပါတီ၏ နိုင်ငံရေးအရာရှိများ) တွေကို အမြစ်ပြတ် သုတ်သင်ရှင်းလင်းဖို့ဖြစ်တယ်လို့ ခင်ဗျားရဲ့ ထွက်ဆိုချက်မှာ ပြောခဲ့တယ်၊ ဒါ မှန်ပါသလား။"

အော်လန်းဒေါ့ဖ် : "မှန်ပါတယ်"

တရားလို ရှေ့နေ: ကလေးတွေကိုကော ဘယ်လို အမျိုးအစားထဲ ထည့်စဉ်းစားထားလဲ၊ ဘယ်လို အကြောင်းနဲ့ ကလေးတွေကိုကော အစုလိုက် အပြုံလိုက် သတ်ခဲ့ရတာလဲ"

အော်လန်းဒေါ့ဖ် : "ဂျုး မှန်သမျှ အကုန် သုတ်သင် ရှင်းလင်း ရမယ်လို့ အမိန့်ရှိထားပါတယ်"

တရားလို ရှေ့နေ: "ကလေးတွေ ပါ မကျန်ပေါ့"

အော်လန်းဒေါ့ဖ် : "ဟုတ်ပါတယ်"

************

ဘင်နီ ဖရင်းဇ်သည် အိုလန်ဒေါ့ ပြောပုံ ဆိုပုံကို ကြည့်ပြီး ၎င်း၏ မောက်မာမှု အပေါ် စဉ်းစားရ ကျပ်နေသည်။ မွေးကင်းစ ကလေးများကို သေနတ်ပစ် လေ့ကျင့်ရန် အတွက် မသုံးဖို့၊ ခေါင်းကို သစ်ပင် နှင့် ရိုက်ပြီး မသတ်ဖို့ ပြောထားသည်ဟု ဆိုသည်၊ သတ်သည့် နေရာတွင် ကလေး ကို မိခင်၏ ရင်ဘတ်တွင် ထားပြီး နှလုံးတည့်တည့်ကို ချိန်ရွယ်ပစ်ရန် ညွှန်ကြားထားသည်။ သို့မှသာ မိခင်ကော ကလေးကို တချက်တည်း နှင့် ပစ်သတ်နိုင်၍ ကျည်ဆံ ချွေတာရာ ရောက် သည်ဟု ဆိုသည်။

သူ၏ တပ်ဖွဲ့သုံးဖို့ ပေးလာသည့် ဓါတ်ငွေ့ အလုံပိတ်ကား ကို လည်း ငြင်းပယ်ခဲ့သည်ဟု အော်လန်း‌ဒေါ့ဖ်က ထွက်ဆိုခဲ့သည်။ ထိုကားထဲ့ ထည့် ပြီး မြုပ်မည့် နေရာ ရောက်၍ တံခါးဖွင့်လိုက်လျင် အထဲရှိ အချို့သည် အသက်ရှင်နေဆဲ ဖြစ်၍ ဆွဲထုတ်ခဲ့ရကြောင်း၊ အန်ဖတ် များ၊ မစဉ်များကို လည်း ဆေးကြောရ၍ ၎င်း၏ တပ်သားများအတွက် အတော်လေး အဆင်မပြေ ဖြစ်လာရ၍ ဟု ဆိုသည်။

၎င်းပြောသမျှ ထဲတွင် မေ့၍ မရသည့် အစော်ကားဆုံးက ထိုသို့ လုပ်ခဲ့ရခြင်းသည် မိမိကိုယ်ကို ခုခံကာကွယ် ရခြင်း ဆိုသော စကားပင် ဖြစ်သည်။

***************

၁၉၄၈ ဧပြီလ ၁၀ ရက်နေ့ တွင် အမိန့်ချမှတ်ခဲ့သည်။ တရားခံများ အား ၎င်းတို့ အတွက် ချမှတ်မည့် စီရင်ချက်ကို ကြားနာရန် တ‌ယောက်ချင်းစီ ခေါ်သွင်းလာချိန်တွင်တော့ တရားရုံးခန်းထဲ ခြောက်ကပ်လုနီး ဖြစ်နေသည်။

အော်တို အောလန်းဒေါ့ဖ် အား ခန္ဓာကိုယ် ထွားကျိုင်းလှ‌ သော အာဖရိကန်-အမေရိကန် စစ်ရဲ နှစ်ဦးက တဖက်တချက်မှ စောင့်ကြပ် ခေါ်လာခဲ့သည်။ လက်ထဲတွင်လည်း အဖြူရောင် နံပတ်တုတ်များ ကိုင်ဆောင်ထားသည်။ အော်လန်းဒေါ့ဖ် သည် အင်္ဂလိပ်လို မပြောတတ်၍ ဘာသာပြန် ကို နားထောင်ရန် နားကြပ်ကို ကောက်တတ်လိုက်သည်။

"တရားခံ အော်တို အော်လန်းဒေါ့ဖ် သင့်အား စွဲဆိုထားသည့် အမှု အားလုံး ပြစ်မှု ထင်ရှားသဖြင့် ယခု ခုံရုံးမှ ကြိုးပေးစီရင်ရန် သေဒဏ် ချမှတ်လိုက်သည်။

အော်လန်းဒေါ့ဖ် သည် စကား တခွန်းမှ မပြော၊ မျက်နှာ အမူအရာလည်း အပြောင်းအလဲ မရှိဘဲ တပ်ထားသည့် နားကြပ်ကို ဖြုတ်ကာ အချုပ်ခန်း ရှိရာသို့ ပြန်သွားခဲ့သည်။

***********************************

နောက်ပိုင်း လေးနှစ် ကြာသည် အထိ ဘင်နီ ဖရင်းဇ်သည် ဂျာမဏီတွင် ရှိနေဆဲ ဖြစ်သည်။ ဖရင်းဇ် သည် စစ်မှုထမ်း ဆင့်ခေါ်ခံရ၍ ဒုတိယ ကမ္ဘာစစ် တလျှောက်လုံး တိုက်ပွဲ ပေါင်း များစွာ ဖြတ် သန်း ခဲ့ပြီး တပ်ကြပ်ကြီး ရာထူး အထိ တိုးမြှင့် ခံခဲ့ရသည်။ စစ်ရာဇဝတ်မှု များကို စုံစမ်းရန် ဂျာမဏီ သို့ ဆင့်‌ခေါ်ခံရသည့် အခါတွင်တော့ ဗိုလ်မှုးကြီးရာထူး အထိ တိုးမြှင့်ပေးခဲ့သည်။

ထို့အတွက် တရားရေး တာဝန်များကြောင့် ၎င်းနှင့် ဇနီး ဖြစ်သူ ဂါးထရုဒ် တို့သည် နောက်ထပ် ခြောက်နှစ် ကြာသည်အထိ အမေရိကား သို့ ပြန်မရောက်နိုင်ခဲ့ကြပေ။ ၎င်း တရားစွဲဆို နိုင်ခဲ့သော တခုတည်း သော အမှု တွင် တရားခံပေါင်း နှစ်ဆယ့် နှစ်ဦး ရှိသည့် အနက် ဆယ်လေးဦးသည် သေဒဏ် စီရင်ခြင်း ခံခဲ့ရသည်။ ကျန် တရားခံများကတော့ ထောင်ဒဏ် အသီးသီး ကျခံခဲ့ရသည်။ ၎င်းတို့အားလုံးသည် SS အဖွဲ့ဝင်များ ဖြစ်ကြသည်။

သို့သော် လည်ပင်းတွင် မ‌‌‌သေမချင်း ကြိုးကွင်းစွပ်သပ်စေ ဟု အမိန့်ချခံရသူ ဆယ့်လေးဦးတွင် လေးဦးသာ ကြိုးစင်တက်သွားခဲ့ရပြီး ကျန်သူများအား ၁၉၅၈ တွင် ထောင်မှ လွှတ်ပေးခဲ့၍ သာမန် လူ တယောက် အဖြစ် သွားလာ နေထိုင် နိုင်ခဲ့ကြသည်။ 

ကြိုးစင် တက်သွားခဲ့ရသည့် လေးဦး ထဲတွင် အော်တို အောလန်းဒေါ့ဖ် လည်း ပါဝင်ခဲ့သည်။