ရန်သူ့ စခန်းအား ညအချိန် တိုက်ရိုက် တိုက်ခိုက်နိုင် ပါက အကောင်းဆုံး ဖြစ်သည်။ လုံလောက်သည့် တိုက်ခိုက်ရေးအရှိန်အဟုန် ရှိမည်၊ လိုအပ်သည့် သတိဥာဏ်ပညာ နှင့် ဆုံးဖြတ်ချက်ပြတ်သားမှု ရှိမည်၊ အလွန်အကျွံ စွန့်စားဖို့လည်း မလိုအပ်လျင် ရန်သူ့စခန်းတစ်ခုကို သိမ်းပိုက်ရယူဖို့ဆိုသည်က ဖြစ်နိုင်ပေသည်။

ဝိုင်းပတ် ပိတ်ဆို့ ထားမည်ဆိုက စောင့်ဆိုင်းနေရမှု နှင့် အကာအကွယ် ယူထားဖို့ လိုသည်။ ရန်သူ့ စခန်းအား တဖြေးဖြေး နှင့် ချဉ်းကပ်ပြီး နည်းမျိုးစုံ နှင့် အနှောက်အယှက်ပေးရမည်။ အပြင်သို့ ထွက်လာပြီး ပစ်ခတ်သည် အထိ ဖြစ်အောင် လုပ်နိုင်ရမည်။ ဝိုင်းပတ်ထားမှုသည် တဖြေးဖြေး နှင့် ကျုံ့လာသည့် အခါ မိုလိုတော့ ကော့တေး ဆိုသည် ဓါတ်ဆီ ပုလင်းဗုံးသည် အထိရောက်ဆုံး လက်နက် ဖြစ်သည်။ ထိုသို့ ပစ်ခတ်နိုင်သည့် အကွာအဝေး သို့ ရောက်မလာမီ အထူး ပြုလုပ်ထားသည့် ယမ်းအား ထည့်ထားသော ပြောင်းတိုသေနတ်များကိုလည်း အသုံးပြုနိုင်သည်။

ကျွန်ုပ်တို့၏ စစ်ပွဲများ အတွင်း M-16 ဟု အမည်ပေးထားသော အဆိုပါလက်နက်များမှာ ပြောင်းတို လုပ်ထားသည့် ၁၆ ပတ်လည်ရိုင်ဖယ်သေနတ်များဖြစ်ပြီး၊ ၎င်းတို့ကို သေနတ်ဒင်နှင့်တွဲဖက်ကာ ဒေါက်တိုင် ပုံစံဖြစ်စေရန်အတွက် ခြေထောက်နှစ်ချောင်းကို တပ်ဆင်ထားခြင်းဖြစ်သည်။ ထိုသို့တပ်ဆင်ထားခြင်းကြောင့် လက်နက်သည် ၄၅ ဒီဂရီခန့် စောင်းနေမည်ဖြစ်ပြီး၊ ခြေထောက်များကို ရှေ့တိုး နောက်ငင် ပြုလုပ်ပေးခြင်းဖြင့် လိုအပ်သလို အနိမ့်အမြင့် ချိန်ညှိနိုင်ပါသည်။ ၎င်းလက်နက်ကို အသုံးပြုရာတွင် ထိပ်ဝဖွင့်ထားပြီး အတွင်းရှိ ခဲသီးစေ့ များအားလုံးကို ဖယ်ထုတ်ထားသည့် ယမ်းတောင့်ဖြင့် ကျည်ဖြည့်ထား ရသည်။ သေနတ်ပြောင်းဝမှ ထွက်နေသော ဆလင်ဒါပုံစံ သစ်သားချောင်းကို ပစ်မှတ်သို့ လွှတ်တင်မည့် လက်နက် ကျည် အဖြစ် အသုံးပြုသည်။

ပုံတွင် ပြထားသလို ရာဘာအောက်ခံပေါ်တွင် တင်ထားသည့် ဓာတ်ဆီပုလင်းကို ထိုသစ်သားချောင်း၏ အဖျားတွင် တပ်ဆင်ရသည်။ ဤကိရိယာသည် မီးလောင်နေသော ပုလင်းများကို မီတာ ၁၀၀ သို့မဟုတ် ထိုထက်ဝေးသော အကွာအဝေးသို့ တိကျမှု အသင့်အတင့် ရှိစွာဖြင့် ပစ်လွှတ်နိုင်စွမ်းရှိသည်။ ရန်သူ စခန်း တွင် သစ်သား သို့မဟုတ် အခြားမီးလောင်လွယ်သော ပစ္စည်းများဖြင့် ဆောက်လုပ်ထားသည့် အဆောက်အအုံများစွာ ရှိနေချိန်၌ ဝိုင်းရံပိတ်ဆို့ တိုက်ခိုက်ရန်အတွက် ဤလက်နက်သည် အကောင်းဆုံးဖြစ်သည်။ ထို့ပြင် တောင်ကုန်းထူထပ်သော ဒေသများတွင် တင့်ကားများကို ပစ်ခတ်တိုက်ခိုက်ရာ၌လည်း များစွာအသုံးဝင်ပါသည်။ 

ထိုသို့ ဝိုင်းပတ် ပိတ်ဆို့ထားခြင်းဖြင့် အောင်ပွဲရလာသည့် အခါ သို့မဟုတ် ရည်မှန်းချက် ပြည့်မြောက်သွားသည့် အခါတွင် မိမိတို့ ကျောပိုးအိတ်များ နှင့် အသုံးအဆောင်များ ထားခဲ့သည့် နေရာသို့ စနစ်တကျ ပြန်လည် ဆုတ်ခွာရမည် ဖြစ်ပြီး ပုံမှန် လုပ်နေကျ အလုပ်များ ပြန်လည် စတင်ရပေမည်။

ဤအဆင့်တွင် ပြောက်ကျားရဲဘော်တို့၏ အတည်တကျမရှိ လှည့်လည်သွားလာနေထိုင်ရသော ဘဝသည် ရဲဘော်များအကြား နက်ရှိုင်းသော ညီရင်းအစ်ကိုစိတ်ဓာတ်ကို ဖြစ်ထွန်းစေရုံသာမက၊ တစ်ခါတစ်ရံတွင် အုပ်စုများ သို့မဟုတ် တပ်စုများအကြား အန္တရာယ်ရှိသော ပြိုင်ဆိုင်မှုများကိုလည်း ဖြစ်ပေါ်စေတတ်သည်။ အကယ်၍ ထိုပြိုင်ဆိုင်မှုများကို အကျိုးရှိစေမည့် အတုယူ ပြိုင်ဆိုင်လိုစိတ် အဖြစ်သို့ လမ်းကြောင်းမပြောင်းပေးနိုင်ပါက၊ စစ်ကြောင်း၏ စည်းလုံးညီညွတ်မှုကို ပျက်ပြားစေမည့် အန္တရာယ်ရှိပါသည်။

တိုက်ပွဲစဝင်သည့် အချိန်မှစ၍ ပြောက်ကျားရဲဘော်များအား ပညာပေးလေ့ကျင့်ရန်မှာ အလွန်ပင် အရေးကြီးလှပါသည်။ ၎င်းတို့၏ နားလည်သဘောပေါက်မှုကို ပိုမိုနက်ရှိုင်းစေရန်နှင့် စရိုက်လက္ခဏာများ ကောင်းမွန်ခိုင်မာလာစေမည့် စိတ်ဓာတ်ရေးရာ သင်ခန်းစာများ ပေးနိုင်ရန်အတွက်၊ ဤတိုက်ပွဲ၏ လူမှုရေးဆိုင်ရာ ရည်ရွယ်ချက်များနှင့် ၎င်းတို့၏ တာဝန်ဝတ္တရားများကို ရှင်းလင်းပြောကြားပေးရမည် ဖြစ်သည်။

ကြုံတွေ့ရသမျှ အတွေ့အကြုံတိုင်းသည် ခွန်အားသစ်များ ဖြစ်ထွန်းရာ အရင်းအမြစ်သာ ဖြစ်သင့်ပြီး၊ ရှင်သန်နိုင်ရေးအတွက် ရုန်းကန်ရသည့် တိုက်ပွဲတစ်ပွဲ၏ ဖြစ်ရပ်တစ်ခု သက်သက်မျှသာ မဖြစ်စေသင့်ပေ။

ပညာရေး နှင့် ပတ်သက်၍ အကောင်းဆုံး ဝိသေသများထဲက တခုသည်ကား နမူနာ ယူနိုင်ခြင်းပင် ဖြစ်သည်။ ထို့ကြောင့် ခေါင်းဆောင်များသည် စင်ကြယ်သန့်ရှင်းပြီး ပေးဆပ်စွန့်လွှတ်သော ဘဝနေထိုင်မှုပုံစံကို လက်အောက်ငယ်သားများအတွက် စံနမူနာအဖြစ် အစဉ်တစိုက် ပြသနေရမည်။ တပ်သား တဦးအားလည်း သတ္တိ၊ စွမ်းဆောင်နိုင်မှု၊ စွန့်လွှတ် အနစ်နာခံလိုစိတ်များကို အခြေခံပြီး သာ ရာထူး တိုးမြှင့် ပေးသင့်သည်။ ထိုသို့ အရည်အသွေးကို အမြင့်ဆုံး အဆင့်အထိ ပိုင်ဆိုင် မထားသူများကို တာဝန်ကြီးကြီး ယူရမည့် ရာထူးမျိုး မပေးသင့်၊ သို့မဟုတ်က တချိန်ချိန်တွင် စိတ်မချမ်းမြေ့ဖွယ်ရာ ဖြစ်ရပ်ဆိုးများ ပေါ်ပေါက် လာနိုင်၍ ဖြစ်သည်။

ပြောက်ကျား တဦး၏ အပြုအမူ ကို ဆုံးဖြတ်ပေးလာမည်က အိမ်တအိမ်သို့ ချဉ်းကပ်ပြီး တစုံတခု တောင်းဆိုလာမည့် အခါ တွင် ဖြစ်သည်။ အိမ်ရှင်သည် ၎င်းတို့ထံမှ အစားအသောက်ဖြစ်စေ၊ အခြား လိုအပ်နေသည့် တစုံတရာကို တောင်းဆိုပုံ တောင်းဆိုနည်းကို ကြည့်ပြီး လိုက်လျောသင့် မသင့် ဆုံးဖြတ်ကြမည်သာ ဖြစ်သည်။ ခေါင်းဆောင် ဖြစ်သူသည် ထိုအကြောင်းကို အသေးစိတ် ဆွေးနွေးပြီး မည်မျှ အရေးပါသည်ကို ရှင်းပြရမည်၊ သူ ကိုယ်တိုင်လည်း နမူနာ လုပ်ပြရပေ မည်။

မြို့ထဲသို့ ဝင်လာသည့် အခါ အရက်သေစာ သောက်စားမှု ကို ခွင့်ပြု၍ မဖြစ်တော့၊ တပ်ဖွဲ့ဝင်များအားလည်း အကောင်းဆုံးသော စည်းကမ်းစနစ်ကို ဖော်ဆောင်နိုင်ရန်အတွက် ကြိုတင်တိုက်တွန်းနှိုးဆော်ထားရမည်။ မြို့ထဲ အဝင် အထွက် ကိုလည်း မျက်ခြေမပြတ် စောင့်ကြည့် နေကြရမည်။

ရန်သူ၏ ဝိုင်းပတ်ပိတ်ဆို့ခြင်းကို ခံရသည့်အချိန်သည် စစ်ပွဲ၏ အန္တရာယ်အရှိဆုံး အခြေအနေပင်ဖြစ်သည်။ ထိုသို့သော အခြေအနေကို ဖြတ်သန်းရချိန်တွင်မှ ပြောက်ကျားတပ်ဖွဲ့တစ်ခု၏ စုဖွဲ့မှု၊ တိုက်ခိုက်ရေးစွမ်းရည်၊ ရဲစွမ်းသတ္တိနှင့် စိတ်ဓာတ်ခိုင်မာမှုတို့သည် အစစ်အမှန် ပေါ်လွင်လာမည်ဖြစ်သည်။

ပြီးခဲ့သည့် စစ်ပွဲအတွင်း ကျွန်ုပ်တို့၏ ပြောက်ကျားစကားရပ်တွင် 'ဝိုင်းပတ်ပိတ်ဆို့ခံရသည့် မျက်နှာထား' Encirclement face ဆိုသည့် အသုံးအနှုန်းရှိသည်။ ယင်းမှာ အလွန်အမင်း ထိတ်လန့်ကြောက်ရွံ့နေသူ တစ်ဦး၏ မျက်နှာတွင် ထင်ဟပ်နေသော ကြောက်ရွံ့မှုကို ဖော်ပြခြင်းဖြစ်သည်။ ရာထူးမှ ဖယ်ရှားခံခဲ့ရသည့် ဘတ်တစ္စတာ အစိုးရအဖွဲ့သည် ၎င်းတို့၏ စစ်ဆင်ရေးများကို 'ဝိုင်းပတ်ပိတ်ဆို့ပြီး အမြစ်ဖြတ်ချေမှုန်းခြင်း'ဟု မောက်မာဝင့်ကြွားစွာ အမည်ပေးခဲ့ကြသည်။

သို့သော်ငြားလည်း မိမိတို့ဒေသ၏ မြေမျက်နှာသွင်ပြင်ကို ကောင်းစွာကျွမ်းကျင်ပြီး မိမိတို့၏ ခေါင်းဆောင်အပေါ်တွင်လည်း ယုံကြည်ချက်၊ သံယောဇဉ်တို့ဖြင့် ခိုင်မြဲစွာ စည်းလုံးထားသည့် ပြောက်ကျားတပ်ဖွဲ့တစ်ခုအဖို့မူ ထိုသို့ ဝိုင်းပတ်ပိတ်ဆို့ခံရခြင်း သည် အထူးတလည် စိုးရိမ်ရသော ပြဿနာတစ်ခု ဖြစ်မလာခဲ့ပေ။

လုပ်ဖို့ လိုသည်မှာ အကာအကွယ်ယူရန်၊ ရန်သူ၏ ရှေ့တိုးလာမှုကို နှောင့်နှေးအောင်လုပ်ရန်၊ ရန်သူ့လက်နက်ကြီးများ၏ လှုပ်ရှားမှုကို ဟန့်တားရန်နှင့် ပြောက်ကျား တို့၏ သဘာဝမဟာမိတ်ဖြစ်သော ည အမှောင်ကို စောင့်ဆိုင်းရန်သာ ဖြစ်သည်။ ထို့နောက် အကောင်းဆုံးလမ်းကြောင်းကို ရှာဖွေရွေးချယ်ပြီး ပြောက်ကျားတပ်ဖွဲ့သည် အတတ်နိုင်ဆုံး အသံတိတ် အလုံခြုံဆုံးနည်းလမ်းဖြင့်လည်းကောင်း၊ အသင့်တော်ဆုံးသော ထွက်ပေါက်များကို အသုံးချ၍လည်းကောင်း၊ လုံးဝဥဿုံ တိတ်ဆိတ်ငြိမ်သက်စွာဖြင့် ရန်သူ့ဝိုင်းပတ်မှုအတွင်းမှ ဆုတ်ခွာရမည်ဖြစ်သည်။

မှောင်မိုက်နေသောအခြေအနေတွင် ပြောက်ကျားတပ်ဖွဲ့ တစ်ဖွဲ့ကို ဝိုင်းပတ်ပိတ်ဆို့မှုအတွင်းမှ လွတ်မထွက်သွားအောင် တားဆီးရန်မှာ အလွန်တရာ ခက်ခဲလှသော ကိစ္စဖြစ်သည်။

**************