ဖီးလ်မာရှယ် ဗွန် ရန်းစတက် ပြောသွားတာက အတော်လေးကို အကျိုး အကြောင်း ခိုင်လုံမှု ရှိလှပါတယ်" ဟု ဗိုဂဲလ် က ပြောရင်း ပြောလက်စ စကားကို ခဏ ရပ်လိုက်သည်၊ ဗွန် ရန်းစတက်ကလည်း
သဘောကျသည့် ပုံဖြင့် ခေါင်းကို ငြိမ့်ပြလိုက်သည်။
"ဒီနေရာမှာ ကျွန်တော်တို့က ဖြစ်နိုင်ခြေ တွေကို ဆွေးနွေးကြရမှာ ဆိုတော့ ကျွန်တော်က နောက်တမျိုး အဓိပ္ပါယ် ဖွင့်လိုပါတယ်"
"ပြောပါ" ဟု ဟစ်တလာက ထောက်ပေးလိုက်သည်။
"ဖီး မာရှယ်ကြီး ထောက်ပြသွားသလို ရန်သူတွေဖက်က ဆိပ်ကမ်းတခု ရဖို့ အရေးတကြီး လိုအပ်နေပါတယ်။ ဒါမှလည်း ကမ်းတက် တိုက်မဲ့ တပ် တွေ အားလုံး အတွက် လိုအပ်တဲ့ ထောက်ပံ့ပို့ဆောင်ရေး တွေ လုပ်လို့ရမှာ ဖြစ်ပါတယ်၊ သူတို့ လုပ်မယ့် စစ်ဆင်ရေး ရဲ့ ကနဦး အဆင့်မှာပဲ တနေ့ကို အနည်းဆုံး တန်ချိန် တသောင်း နဲ့ ညီမျှတဲ့ ထောက်ပို့ ရိက္ခာနဲ့ ယန္တရားတွေ ပို့ဖို့ လိုနေပါတယ်၊ ပတ်စ် ဒီ ကလေ့စ် ဖက်မှာ ရှိတဲ့ ဆိပ်ကမ်းတိုင်း ဒီပမာဏာကို လက်ခံလို့ ရနေပါတယ်၊ ဥပမာ ကလေ့စ်၊ ဘိုလုံး နဲ့ ဒန်းကပ်တို့ပါ၊ ဖီး မာရှယ်ကြီး စောစောက ပြောသွားသလိုပါပဲ ကျွန်တော်တို့ဖက်က လက်နက်ချရဖို့ ဖြစ်လာရင် ဒီဆိပ်ကမ်းတွေ အားလုံး ဖျက်ဆီးပစ်မှာ လို့ ရန်သူက သိထားပြီးသားပါ၊ ပြီးတော့ ဒီဆိပ်ကမ်းတွေ ကို ရန်သူ့လက် မကျအောင် နဂိုတည်းက အခိုင်အမာ ကာကွယ်ဖို့ လုပ်ထားတယ် ဆိုတာလည်း ရန်သူဖက်က သိထားပြီးပါပြီ၊ ဒီလို အနေအထားကို ထိတ်တိုက် ရင်ဆိုင်ရမယ် ဆိုရင် သူတို့ဖက်က အကျ အဆုံး အဆမတန် များသွားနိုင်ပါတယ်"
သူ ပြောနေသည်များကို နားထောင်နေသော ဟစ်တလာ က စိတ်ရှည်ပုံ မရတော့ပဲ ဂဏှာမငြိမ် ဖြစ်လာနေသည်ကို ဗိုဂဲလ်က သတိထားမိသွား၍ ပြောလက်စ စကားကို အမြန် အဆုံးသတ် ရန် ကြိုးစားလိုက်သည်။
"နော်မန်ဒီ ကမ်းခြေတလျှောက်မှာ ငါးဖမ်းစက်လှေတွေ ကပ်လို့ရတဲ့ ဆိပ်ကမ်းငယ်လေး တွေ အများကြီး ရှိနေပါတယ်၊ ဒါပေမယ့် ကျွန်တော် ခုန ပြောတဲ့ ပစ္စည်းတန်ချိန် လောက်ကို လက်ခံနိုင်စွမ်း မရှိပါဘူး၊ ချားဘို ဆိပ်ကမ်းတောင် မရလောက်ပါဘူး၊ အဲ့ဒီ ဆိပ်ကမ်းက ခရီးသည်တင် အတ္တလန်တိတ် ပင်လယ်ကူး သင်္ဘောတွေ လူ အတင်အချ လုပ်နိုင်အောင် ဒီဇိုင်းဆွဲ ဆောက်ထားတာ ဖြစ်ပြီး ကုန်တင်ကုန်ချ လုပ်လို့ မရပါဘူး"
'မောင်ရင် ဘာပြောချင်တာလဲ" ဟု ပြောလိုက်သော ဟစ်တလာ အသံတွင် ဒေါသသံများ ရောယှက် လာသည်။
"ဒီလိုပါ ဖူးဟား၊ ရန်သူ အနေနဲ့ ဒီလို ဆိပ်ကမ်းမျိုးကို သုံးမယ့်အစား ကမ်းစပ် နားမှာပဲ သူတို့ လိုအပ်နေတဲ့ ရိက္ခာ၊ ထောက်ပို့နဲ့ ယန္တရားတွေ ချမယ်ဆိုရင်ကော မဖြစ်နိုင်ဘူးလား၊ အဲ့လို လုပ်လို့ ရမယ်ဆိုရင် ရန်သူက ကျွန်တော်တို့ အခိုင်အမာ တပ်စွဲထားတဲ့ ဆိပ်ကမ်းတွေကို ရှောင်ပြီး အကာအကွယ် သိတ်မရှိလှတဲ့ နော်မန်ဒီ ကမ်းခြေ တဝိုက် ကနေ ဝင်လာနိူင်ပါတယ်၊ ပြီးရင် ဆိပ်ကမ်း အတု တည်ဆောက်ပြီး လိုအပ်တဲ့ ပစ္စည်းတွေ ထောက်ပံ့ ပေးနိုင်ဖို့ ကြိုးစားတော့ မှာ ဖြစ်ပါတယ်"
ဟစ်တလာ၏ မျက်လုံးများက ပုတ်ခတ် ပုတ်ခတ် ဖြစ်လာသည်၊ သူ့စိတ်ထဲတွင် ဗိုဂဲလ်၏ သုံးသပ်မှု အပေါ် စိတ်ဝင်တစား ဖြစ်လာဟန် ရှိသည်။
ဖီး မာရှယ် အာဝင် ရွမ်းမဲ ကတော့ ခေါင်းကို ခါရမ်းနေသည်။ "မောင်ရင် ပြောတဲ့ အတိုင်း ဖြစ်လာမယ် ဆိုရင် သူတို့အဖို့ ဒုက္ခ အကြီးအကျယ် ရောက်တော့မှာပေါ့၊ နွေဦးပေါက်မှာတောင် ရေလက်ကြား က ကမ်းခြေ တလျှောက်မှာ ဒီလောက် အန္တရာယ်များနေတာ၊ မိုးသဲ ပြီး လှိုင်းကြီး လေထန် ဖြစ်နေတယ်၊ ကျုပ် ရဲ့ အရာရှိတွေက ရာသီဥတု ပုံစံကို လေ့လာခဲ့ကြပြီးပြီ၊ ရာသီဥတုက အရင် အရင့် အတိုင်းပဲ ဖြစ်မယ် ဆိုရင် ရန်သူတွေ အဖို့ ရာသီဥတု ကောင်းမယ်လို့ မျှော်လင့်ရတဲ့ ရက်ဆိုလို့ တခါတခါ သုံးလေးရက်ထက် မပိုဘူး၊ အခုလို ဟာလာဟင်းလင်းကြီး ဖြစ်နေတဲ့ ကမ်းခြေ မှာ ဆိပ်ကမ်းဆိုလို့ မရှိ၊ လှိုင်းဒဏ်ကနေ အကာအကွယ် ရနိုင်တဲ့ နေရာမျိုးလည်း မရှိပဲ တပ်အင်အား အလုံးအရင်း တည်ဆောက်လာမယ် ဆိုရင် သူတို့ကို သဘာဝတရားကြီးက ညှာတာ ပေးမှပဲ သက်သာရာ ရဖို့ ရှိတော့မယ်၊ ဘယ်လောက်ပဲ
ကောင်းပါတယ် ဆိုတဲ့ လက်ကိုင် ပစ္စည်း တခု တလေမှ အင်္ဂလိပ် ရေလက်ကြားမှာ တိုက်နေတဲ့ နွေဦးပေါက် လေကြမ်းကို ခံနိုင်ရည် ရှိမှာ မဟုတ်ဘူး"
"အတော်လေး ကို စိတ်ဝင်စားဖို့ ကောင်းတဲ့ ဆွေးနွေးချက်တွေပဲ လူကြီးမင်းတို့၊ ဒီနေ့အဖို့ တော်လောက်ပါပြီ၊ ကဲ..ကက်ပတိန် ဗိုဂဲလ်- မောင်ရင့် အေးဂျင့်ဆီက ဒီထက် ပြည့်ပြည့်စုံစုံ သိဖို့လိုသေးတယ်၊ သူ အခုထိ ဟိုမှာ ရှိနေတုန်းပဲ မဟုတ်လား" ဟု ဟစ်တလာက ဖြတ်ပြောလိုက်သည်။
ဒီတကြိမ်လည်း ဗိုဂဲလ် အဖို့ စကားကို သတိထား ပြောရဖို့ ကြုံလာရပြန်သည်။
"ပြဿနာ တခု က ရှိနေပါတယ် ဖူးဟား၊ ကျွန်တော်ရဲ့ အေးဂျင့် က သူ့ကို ဗြိတိသျှ လုံခြုံရေး အဖွဲ့တွေ
ခြေရာခံ မိနေပြီလို့ ယူဆနေပါတယ်၊ ဒီအတွက် အင်္ဂလန်မှာ ဆက်ထားဖို့ လုံခြုံ မှု ရှိလှတော့မယ် မထင်ဘူး"
ဒီတကြိမ်တွင်တော့ ဝေါ်လ်တာ ရှလင်းဘတ်ထံမှ ပထမဦးဆုံးအကြိမ် စကားသံ ထွက်လာသည်။ "ကက်ပတိန် ဗိုဂဲလ်-- လန်ဒန်မှာ ရှိတဲ့ ကျွန်တော်လူတွေကတော့ တမျိုး ပြောနေကြပါလား၊ လောလောဆယ် ဗြိတိသျှတွေဖက်က သတင်းပေါက်ကြားတာ ကို သိနေပေမယ့် ဘယ်က ထွက်လာမှန်း မသိကြသေးဘူး ဆိုပဲ၊ ခင်ဗျား အေးဂျင့်က သူထင်ရာ တွေ ပြောနေတာများလား"
အတော်ကို မောက်မာတဲ့ လူပါလားဟု ဗိုဂဲလ် က တွေးလိုက်ရင်း လန်ဒန်မှာ ရှိတဲ့ သူ့လူက ဘယ်လောက်များ အရေးပါတဲ့ နေရာမှာ ရှိနေတာမို့လို့လဲ၊ "ကျွန်တော်တို့ အေးဂျင့် ကို အထူး လေ့ကျင့်ပေးထားတဲ့ အပြင် သူကိုယ်တိုင်ကလည်း ထက်ထက် မြက်မြက် ရှိတဲ့လူ တယောက်ပါ၊ ကျွန်တော့် အထင်....."
"မောင်ရင် က ဘရီးဂိတ် ဖူးဟား ရဲ့ လူဟာ မောင်ရင့် လူလောက် ယုံကြည်စိတ်ချရမှူ မရှိဖူးလို့ ပြောလိုတာတော့ မဟုတ်ပါဘူးနော်" ဟု ဟင်းမလားက ဝင် ငေါ့လိုက်သည်။
"လေးစားပြီးသား ဖြစ်တာမို့ ကျွန်တော် အနေနဲ့ ဘရီးဂိတ်ဖူးဟား ရဲ့ သတင်းအရင်းအမြစ်ကို ယုံကြည်စိတ်ချရမှု ရှိမရှိ သုံးသပ်စရာ အကြောင်းမရှိပါဘူး ခင်ဗျ"
"သံတမန် တယောက်လို ပါးရည်နပ်ရည် ရှိပါပေတယ် ဟား ကက်ပတိန်၊ ဒါပေမယ့် မောင်ရင့်ရဲ့ အေးဂျင် အနေနဲ့ အခုလုပ်နေတဲ့ ကွန်ကရိ တုံးတွေ အကြောင်း တိတိကျကျ သိရတဲ့အထိ ဆက် ရှိနေသင့်တယ်၊ ကျုပ် ပြောတာ ဘယ်လို သဘောရလဲ"
ဗိုဂဲလ် အဖို့ ချောင်ပိတ်မိနေပြီ ဖြစ်သည်၊ ဟင်းမလား ပြောသည်ကို သဘောမတူဟု ဆိုပါက သူ့အတွက် သေမိန့်ကို သူကိုယ်တိုင် လက်မှတ်ထိုး ပေးလိုက်သည်နှင့် အတူတူပင် ဖြစ်ပေလိမ့်မည်။ သူ့အား အကြောင်းတခု မဟုတ် တခုရှာပြီး နိုင်ငံတော် အပေါ် သစ္စာဖေါက်မှုဖြင့် အခြားလူများအား လုပ်သလို စန္ဒယားကြိုး ဖြင့် လည်ပင်းတွင် ပတ်၍ အသာလေး ကွပ်မျက် ပစ်နိုင်သည်။
ဇနီးဖြစ်သူ ဂါးထရုဒ် နှင့် ကလေးများကိုလည်း မျက်စိထဲ မြင်ယောင်လာမိသည်၊ အရိုင်းအစိုင်း ကောင်များက သူတို့အားလည်း ချမ်းသာပေးလိမ့်မည် မဟုတ်၊ အင်နာ၏ ဖြစ်လာသော ပြဿနာများကို ချက်ခြင်း လက်ငင်း ဆုံးဖြတ်နိုင်မှုကိုသာ အားထားရပေတော့မည်။ လက်ရှိတွင် သူမအား ဆွဲထုတ်လိုက်ပါက ကိုယ့်ကိုကိုယ် သေကြောင်းကြံသည်နှင့် အတူတူ ဖြစ်သွားပေလိမ့်မည်။ သူ့မအား
ဆက်ထားဖို့က လွဲပြီး အခြား ရွေးစရာ လမ်း မရှိတော့ပေ။
"ဒါကို ကျွန်တော်လည်း သဘောတူပါတယ်"
**********************
ဟင်းမလားက သူနှင့် အတူ အနီးအနား တဝိုက် လမ်းလျှောက်လိုက်ရန် ဖိတ်ခေါ်လာသည်။ ပတ်ဝန်းကျင်တွင်တော့ အမှောင်ထုက စိုးမိုးလာနေပြီ ဖြစ်သည်။ အဆောက်အဦး ပတ်ဝန်းကျင်တွင် ထိုးထားသော အဖြူရောင် ဆလိုက်မီးများ အလွန် တောအုပ်ကြီးထဲတွင်တော့ ပိန်းပိတ်အောင် မှောင်မဲနေပြီ ဖြစ်သည်။ မိုင်းများ ထောင်ထား၍ လူသွားလမ်း အတိုင်း လျှောက်ရန် သတိပေး ဆိုင်းဘုတ်များကို တွေ့လာရသည်။
လေအဝှေ့တွင် ထင်းရူးပင် ထိပ်ဖျား များ လှုပ်ခါသွားသည်ကို တွေ့လိုက်ရသည်။ ခွေးတကောင်၏ ဟောင်သံကိုလည်း ကြားလိုက်မိသည်။ နှင်းများ ထပ်ကျထားသဖြင့် အသံကို ခပ်အုပ်အုပ်သာ ကြားနေရ၍ ဘယ်လောက်ဝေးဝေးက လာသည်ကိုတော့ မှန်းရခက်နေသည်။ အအေးဒဏ် က ဆိုးဝါးလှသည်။
ပြီးခဲ့သည့် အစည်းအဝေးအတွင်း ကြုံတွေခဲ့ရမှု များကြောင့် သူ၏ ကျူးနစ် ယူနီဖောင်းအောက်တွင် ချွေးများ စီးကျလာနေသည်။ ထို့အတွက် သူ၏ အဝတ်အစားများ အေးခဲသွားမည်ကိုပင် စိုးရိမ်နေရသည်။
စီးကရက် သောက်ချင် နေမိသော်လည်း ဒီနေ့အဖို့ ဟင်းမလား သဘောမကျတာ ထပ်မလုပ်မိအောင် နေမှ ဖြစ်မည်ဟု တွေးမိ၍ သောက်ချင်စိတ်ကို မြိုသိပ်ထားလိုက်ရသည်။
ဟင်းမလား ထံမှ စကားသံ ထွက်လာသော်လည်း အသံက ကြားရယုံမျှသာ ဖြစ်နေသည်။ သူတို့ ရောက်နေသော တောကြီးထဲ အသံဖမ်းစက်များ တပ်၍ ရနေလေရော့သလားဟု တွေးလိုက်မိပြန်သည်။
"မောင်ရင် လုပ်ဆောင်ချက်တွေက မချီးကြူးပဲ မနေနိူင်လောက်အောင် ပြောင်မြောက်ပါပေတယ်"
"အခုလို ချီးကြူးစကား ကြားရတဲ့ အတွက် ကျွန်တော် ဂုဏ်ယူမိပါတယ် ဟား ရိုက်ခ်ျ ဖူးဟား ခင်ဗျ'
"ဒါနဲ့ မောင်ရင့် အေးဂျင် ဆိုတာက အမျိုးသမီး တယောက်ဆို"
ဗိုဂဲလ်က ဘာမှ ပြန်မဖြေပဲ ခပ်မဆိတ် နေလိုက်သည်။